الماتىداعى مەدەۋ بيٸك تاۋلى مۇز ايدىنى ماڭىنداعى اقىلى اۆتوتۇراق وپەراتورى «Chimbulak Development» جشس-نە قاتىستى مونوپولييالىق جاعدايدى تەرٸس پايدالانۋ بەلگٸلەرٸ انىقتالدى, دەپ حابارلايدى dalanews.kz.
كومپانيياعا قاتىستى قر بەسەكەلەستٸكتٸ قورعاۋ جەنە دامىتۋ اگەنتتٸگٸنٸڭ الماتى قالاسى بويىنشا دەپارتامەنتٸ تيٸستٸ حابارلاما شىعاردى.
تەكسەرۋ بارىسىندا كومپانييانىڭ كٶلٸك تۇراعىنا ساعاتىنا 500 تەڭگە مٶلشەرٸندە بٸرىڭعاي تاريف بەلگٸلەگەنٸ انىقتالعان. بۇل رەتتە كٶلٸكتٸڭ تۇراقتا قانشا ۋاقىت تۇرعانىنا قاراماستان اقى الىنعان جەنە ازاماتتارعا كەپٸلدەندٸرٸلگەن تەگٸن ۋاقىت قاراستىرىلماعان.
اگەنتتٸك مەلٸمەتٸنشە, مەدەۋ مەن شىمبۇلاققا جەكە كٶلٸگٸمەن بارعان ازاماتتار 12 ساعات تۇراق ٷشٸن 6 مىڭ تەڭگە, ال 24 ساعات ٷشٸن 12 مىڭ تەڭگە تٶلەگەن. سونىمەن قاتار تەگٸن كٷتۋ ۋاقىتىنىڭ بولماۋى مەدەۋدەن تٷسٸپ كەلە جاتقان ادامداردى كٷتٸپ الاتىن جٷرگٸزۋشٸلەرگە دە قولايسىزدىق تۋدىرعان.
ازرك جٷرگٸزگەن تالداۋ قالانىڭ ٸرٸ نىساندارى ماڭىنداعى اۆتوتۇراقتاردا تۇراق قۇنىن كٶلٸكتٸڭ تۇرعان ۋاقىتىنا قاراي سارالاۋ قالىپتاسقانىن كٶرسەتتٸ. سونداي-اق مۇنداي ورىنداردا ەدەتتە 15 مينۋتتىق تەگٸن كەزەڭ قاراستىرىلعان.
اگەنتتٸك كومپانييانىڭ بۇل ەرەكەتتەرٸ ازاماتتاردىڭ قوعامدىق پايدالانۋداعى نىساندار مەن تابيعي-مەدەني مۇرا وبەكتٸلەرٸنە قولجەتٸمدٸلٸگٸنە جاساندى كەدەرگٸ كەلتٸرۋٸ مٷمكٸن ەكەنٸن اتاپ ٶتتٸ.
قازٸر «Chimbulak Development» انىقتالعان زاڭ بۇزۋشىلىق بەلگٸلەرٸن جويۋ بويىنشا شارالار قابىلدادى. 1 قىركٷيەكتەن باستاپ اۆتوتۇراقتا 15 مينۋت تەگٸن تۇرۋعا مٷمكٸندٸك بەرٸلەدٸ. سونىمەن قاتار تەۋلٸكتٸك تۇراق اقىسى 4500 تەڭگەدەن اسپايتىن بولادى.
جاڭا تەرتٸپ قالالىق اۆتوتۇراقتاردا قالىپتاسقان جالپى ستاندارتتارعا سەيكەس كەلەدٸ.
