Almatydaǵy Medeý biik taýly muz aidyny mańyndaǵy aqyly avtoturaq operatory «Chimbulak Development» JShS-ne qatysty monopoliialyq jaǵdaidy teris paidalaný belgileri anyqtaldy, dep habarlaidy dalanews.kz.
Kompaniiaǵa qatysty QR Básekelestikti qorǵaý jáne damytý agenttiginiń Almaty qalasy boiynsha departamenti tiisti habarlama shyǵardy.
Tekserý barysynda kompaniianyń kólik turaǵyna saǵatyna 500 teńge mólsherinde biryńǵai tarif belgilegeni anyqtalǵan. Bul rette kóliktiń turaqta qansha ýaqyt turǵanyna qaramastan aqy alynǵan jáne azamattarǵa kepildendirilgen tegin ýaqyt qarastyrylmaǵan.
Agenttik málimetinshe, Medeý men Shymbulaqqa jeke kóligimen barǵan azamattar 12 saǵat turaq úshin 6 myń teńge, al 24 saǵat úshin 12 myń teńge tólegen. Sonymen qatar tegin kútý ýaqytynyń bolmaýy Medeýden túsip kele jatqan adamdardy kútip alatyn júrgizýshilerge de qolaisyzdyq týdyrǵan.
AZRK júrgizgen taldaý qalanyń iri nysandary mańyndaǵy avtoturaqtarda turaq qunyn kóliktiń turǵan ýaqytyna qarai saralaý qalyptasqanyn kórsetti. Sondai-aq mundai oryndarda ádette 15 minýttyq tegin kezeń qarastyrylǵan.
Agenttik kompaniianyń bul áreketteri azamattardyń qoǵamdyq paidalanýdaǵy nysandar men tabiǵi-mádeni mura obektilerine qoljetimdiligine jasandy kedergi keltirýi múmkin ekenin atap ótti.
Qazir «Chimbulak Development» anyqtalǵan zań buzýshylyq belgilerin joiý boiynsha sharalar qabyldady. 1 qyrkúiekten bastap avtoturaqta 15 minýt tegin turýǵa múmkindik beriledi. Sonymen qatar táýliktik turaq aqysy 4500 teńgeden aspaityn bolady.
Jańa tártip qalalyq avtoturaqtarda qalyptasqan jalpy standarttarǵa sáikes keledi.
