مايقايىڭدا قازا تاپقان ءتورت قۇتقارۋشىنىڭ وتباسى جۇمىس بەرۋشىنى سوتقا بەرىپ، 120 ملن تەڭگە ءوندىرىپ الدى، - دەپ حابارلايدى Dalanews.kz.
بيىل 4 قاڭتاردا «مايقايىڭ التىن» اق اۋماعىنداعى بولجامدى ءورت ورنىنا تەحنولوگيالىق جولمەن كەلە جاتقاندا ءۇش قۇتقارۋشى مەن جۇرگىزۋشىسى بار اۆتوبۋس شۇڭقىرعا قۇلاپ كەتكەن بولاتىن. قازا تاپقاندار - «كاسىبي اسكەريلەندىرىلگەن اۆاريالىق-قۇتقارۋ قىزمەتتەرىنىڭ رەسپۋبليكالىق ورتالىق شتابى» ءجشس-نىڭ قىزمەتكەرلەرى.
وسى فاكتى بويىنشا قۇرامىندا قازاقستان رەسپۋبليكاسى توتەنشە جاعدايلار مينيسترلىگى، پاۆلودار وبلىسىنىڭ اكىمدىگى، مەملەكەتتىك ەڭبەك ينسپەكتورى، «مايقايىڭ التىن» اق، «كاسىبي اسكەريلەندىرىلگەن اۆاريالىق-قۇتقارۋ قىزمەتتەرىنىڭ رەسپۋبليكالىق ورتالىق شتابى» جشس-نەن قۇرالعان كوميسسيا جازاتايىم وقيعاعا تەكسەرۋ جۇرگىزىپ، ونىڭ قورىتىندىسى بويىنشا جۇمىس بەرۋشىنىڭ كىناسى - 100 پايىز ەكەنى، ال قۇتقارۋشىلار كىنالى ەمەس ەكەنى انىقتالدى.
قايتىس بولعان قۇتقارۋشىنىڭ اناسى، قىزى، ۇلى جانە اپكەسى قىزمەتتىك مىندەتتەرىن اتقارۋ كەزىندە ونىڭ قايتىس بولۋىنا بايلانىستى مورالدىق زياندى وتەۋ تۋرالى سوتقا جۇگىنگەن.
مورالدىق زيان ولاردىڭ مورالدىق ازاپ شەگۋىنەن، ۇلىنان، اكەسىنەن، اعاسىنان ايىرىلۋىنىڭ اۋىرلىعىنان، جەرلەۋ كەزىندە ونىمەن قوشتاسۋعا مۇمكىندىك بولماۋىنان، جۇمىس بەرۋشىنىڭ كوڭىل ايتىپ، قولداۋ كورسەتپەۋىنەن بولىپ وتىر.
سوت بولعان جازاتايىم وقيعاعا جۇمىس بەرۋشىنىڭ 100 پايىز كىناسىن نەگىزگە الا وتىرىپ، قايتىس بولعان قۇتقارۋشىنىڭ تۋىستارىنىڭ تالاپتارىن تولىق كولەمدە قاناعاتتاندىرىپ، ءاربىر تۋىسىنىڭ پايداسىنا قويىلعان تالاپ كولەمىندە 30 000 000 تەڭگەدەن، جالپى سوماسى 120 ميلليون تەڭگە مورالدىق زياندى ءوندىردى.
شەشىم زاڭدى كۇشىنە ەنگەن جوق.
