مايقايىڭدا ەكى قۇتقارۋشى ءالى دە تابىلماي جاتىر. الەۋمەتتىك جەلىدە قۇتقارۋشى ايدوس شايمەردەننىڭ ايەلى ۇندەۋ جاسادى، - دەپ حابارلايدى Dalanews.kz.

ونىڭ سوزىنشە، ىزدەستىرۋ-قۇتقارۋ جۇمىستارى جۇرگىزىلگەن ءبىر اي ىشىندە وقيعا ورنىندا جەكە مەنشىك قۇتقارۋ قىزمەتتەرى عانا جۇمىس اتقارعان. 

"بالكىم العاشقى كۇنى دەنەسى تابىلعان ەكى قۇتقارۋشى سەكىلدى ەكەۋىنىڭ دە دەنەسى شۇڭقىردىڭ ءبىر بۇرىشىندا، توپىراق استىندا جاتقان شىعار. ءبىز سولاي ەكەنىنە سەنىمدىمىز. تەمىر-تەرسەك اۆتوبۋستى ىزدەپ قايتەدى؟! ودان دا ادامداردى ىزدەسىن. ىزدەستىرۋ كەزىندە باسقا قۇتقارۋشىلارعا تونگەن ءقاۋىپ بارىن تۇسىنەمىز. الايدا وسىلاي ورتا جولدان قالدىرۋ ادامگەرشىلىككە جاتپايدى عوي. جۇمىستاردى توقتاتۋعا بولمايدى. بارلىق قاۋىپسىزدىك شاراسىن ساقتاي وتىرىپ جالعاستىرۋ قاجەت دەپ ەسەپتەيمىن"، - دەيدى قۇتقارشىنىڭ ايەلى.

ول جاۋاپتى ورگاندارعا بىرنەشە تالاپ قويدى.

"بىرىنشىدەن، ەكى ادامدى ىزدەستىرۋ جۇمىستارىن توقتاتپاسىن. ەكىنشىدەن، اۆتوبۋس قۇلاعان تۇستان جوعالعانداردىڭ دەنەسى جاتۋى مۇمكىن جەرلەردى تەكسەرسىن. ءۇشىنشى، كينولوگيالىق قىزمەتتى قايتادان تارتسىن. تورتىنشىدەن، ەلىمىزدىڭ باسقا ايماقتارىنان نەمەسە رەسەي ەلىنەن تاجىريبەلى مامانداردى الدىرتسىن"، - دەيدى ول.

ايتا كەتەيىك، وقيعا 4 قاڭتاردا ساعات 01:25 شاماسىندا باياناۋىل اۋدانىنداعى "مايقايىڭ التىن" اق اۋماعىندا بولدى. بۇل كەزدە اۆتوبۋس شۇڭقىرعا ءتۇسىپ كەتتى. كەيىن ەكى ادام ءولى تابىلدى.