اتىراۋدا ق ر تۇڭعىش پرەزيدەنتى كۇنى قارساڭىندا ميالى قورعانىنان تابىلعان «ۇلى دالا جاۋھارى» اتتى التىن ادام رەكونسترۋكسياسىنىڭ اشىلۋ سالتاناتى ءوتتى. شاراعا اتىراۋ وبلىسى اكىمى ماحامبەت دوسمۇحامبەتوۆ ارنايى قاتىستى، – دەپ حابارلايدى اتىراۋ وبلىستىق كوممۋنيكاسيالار قىزمەتى.

اشىلۋ سالتاناتى بارىسىندا ميالى قورعاندارىنان تابىلعان 250-گە جۋىق تاريحي قۇندىلىق كورەرمەن نازارىنا ۇسىنىلدى.

شاراعا ارنايى قاتىسقان وبلىس اكىمى ماحامبەت دوسمۇحامبەتوۆ تاريحتى تۇگەندەۋ جۇمىستارى ءار كەز باستى نازاردا ەكەنىن ايتتى. ونىڭ سوزىنشە، ءتول تاريحىمىزدىڭ تامىرى تەرەڭدە. ءوز داۋىرىندە ۇلى مەملەكەتتەر قۇرىپ، الەم وركەنيەتىنە ۇلەس قوسقان ەلمىز. سوڭعى جىلدارى تابىلعان مىڭداعان جىلداردىڭ سىرىن بۇگىپ جاتقان باعا جەتپەس تاريحي جادىگەرلەر وعان ناقتى مىسال بولا الادى.

– بيىل تابىلعان سارمات تايپاسىنىڭ اقسۇيەگى  تاريحي جادىمىزدى جاڭعىرتقان جاڭالىق بولدى. بۇگىن كۋا بولىپ وتىرعان ميالى قورعاندارىنان تابىلعان ەكىنشى «التىن ادام» دا ۇلى دالامىزدىڭ دارا جاۋھارى. قۇندى جادىگەرلەرىمىز ءبىزدىڭ 2 مىڭ جىل بۇرىنعى تەرەڭ تاريحىمىزدى زەرتتەۋگە مۇمكىندىك بەرەدى.

اتىراۋ ولكەسىنىڭ قويناۋى تەك قازبا بايلىققا عانا ەمەس، تاريحي قۇندىلىقتارعا دا تولى. ءتول تاريحىمىزدى تۇگەندەۋ جۇمىستارى باستى نازارىمىزدا بولادى. توپىراعى تاريحقا تۇنعان اتىراۋ ءوڭىرىنىڭ ۇلتتىق كودتى جاڭعىرتۋدىڭ ۇستىنىنا اينالارىنا سەنەمىن، – دەدى ايماق باسشىسى ماحامبەت دوسمۇحامبەتوۆ.

وبلىس اكىمى سونداي-اق شارا بارىسىندا ۇلتتىق قۇندىلىقتارىمىزدىڭ جاندانۋىنا ەرەن ەڭبەك ءسىڭىرىپ جۇرگەن قىرىم التىنبەكوۆتىڭ ەڭبەكتەرىن ەرەكشە اتاپ ءوتىپ، ارنايى ريزاشىلىعىن ءبىلدىردى.

ميالى قورعاندارىنا جۇرگىزىلگەن قازبا جۇمىستارىنىڭ عىلىمي جەتەكشىسى مارات قاسەنوۆتىڭ ايتۋىنشا، قازبا جۇمىستارى ناتيجەسىندە تابىلعان ايەل ادام سارمات تايپالارىنا تيەسىلى. ايەلدىڭ ۇستىندەگى كيىمى ءارتۇرلى جادىگەرلەرى مەن بۇيىمدارىنىڭ كوبى التىننان جاسالعان.

– ءقابىردى توپىراقتان تازالاۋ كەزىندە التىن جاپسىرمالار مەن التىن سىرعانىڭ بولىكتەرى دە شىقتى. قاڭقانىڭ اياق جاعىنان ءپىشىنى شار تارىزدەس، ءتورتقۇلاقتى قولا قازان تابىلدى. جالپى بيىكتىگى  23 سم بولاتىن قولا قازاننىڭ ءپىشىنى شار تارىزدەس. قازاننىڭ تىگىنەن ورنالاسقان 4 تۇتقاسى بار، قاراما قارسى ورنالاسقان ەكەۋى جىلقىنىڭ ستيلدىك بەينەلەنگەن تۇرىندە، قازان ىشىنە قاراپ تۇرعانداي اسەر بەرەدى. جىلقىنىڭ جالى، قۇلاعى جانە قۇيرىعى انىق بەينەلەنگەن. ودان بولەك تەمىردەن جاسالعان 2 ات ابزەلى، بەلدىك جاپسىرمالارى، سىرعا، قۇس بەينەلى جاپسىرمالار، التىن جاپسىرما، قولا جەبە ۇشتارى، قىش ىدىس  سەكىلدى جادىگەرلەر دە انىقتالدى، – دەيدى مارات قاسەنوۆ.

سونىمەن قاتار ارحەولوگ اتىراۋ وڭىرىندە وبالاردىڭ كوپ ەكەندىگىن، ءالى دە ءبىراز تاريحي قۇندىلىقتار زەرتتەلىپ جاتقانىن اتاپ ءوتتى.