سەنات ءتوراعاسى ماۋلەن اشىمبايەۆتىڭ قاتىسۋىمەن «ۇلتتىق مۇددە» ديالوگ الاڭىنىڭ كەزەكتى وتىرىسى ءوتتى. ءىس-شارا «ادىلەتتى قازاقستاننىڭ ورتاق قۇندىلىقتارى» تاقىرىبىنا ارنالدى. وتىرىسقا قاتىسقان زيالى قاۋىم وكىلدەرى مەن ساراپشىلار ەلىمىزدە جۇرگىزىلگەن قوعامدىق-ساياسي رەفورمالاردىڭ ناتيجەلەرىن تالقىلادى. سونداي-اق ادىلەتتى قازاقستان جانە ينتەللەكتۋالدى ۇلت قالىپتاستىرۋ بارىسىنداعى ۇلتتىق قۇندىلىقتاردىڭ رولىنە كەڭىنەن توقتالدى.
ديالوگ الاڭىنىڭ جۇمىسىن باستاعان ماۋلەن اشىمبايەۆ ەلىمىزدە مەملەكەت باسشىسى قاسىم-جومارت كەمەل ۇلى توقايەۆتىڭ باستاماسىمەن اۋقىمدى رەفورمالار جۇرگىزىلىپ جاتقانىن اتاپ ءوتتى. سونداي-اق ول كونستيتۋسياعا ەنگىزىلگەن وزگەرىستەر ادىلەتتى قازاقستان قۇرۋ جولىنداعى ماڭىزدى قادامدار بولعانىن تىلگە تيەك ەتتى.
سەنات ءتوراعاسى زاڭ شىعارۋ سالاسىنداعى جاڭاشىلدىقتارعا دا نازار اۋداردى. سونىڭ اياسىندا بۇگىندە سەنات وڭىرلەردىڭ مۇددەسىن قورعايتىن پالاتا رەتىندە قالىپتاسىپ جاتقانى بەلگىلى.
«ادىلەتتى قازاقستان دەگەنىمىز – ءبىرىنشى كەزەكتە، بارلىق سالاعا ادىلەتتىلىك قاعيداتىن ەنگىزۋ. وسى باعىتتاعى ورتاق ماقساتتارعا قول جەتكىزۋ ءۇشىن مەملەكەتتىك ينستيتۋتتار مەن ازاماتتىق قوعامنىڭ كۇشىن بىرىكتىرىپ، ءار ىستە ۇلتتىق مۇددە تۇرعىسىنان سارالاپ ارەكەت ەتۋ اسا ماڭىزدى. بۇگىنگىدەي سىندارلى كەزەڭدە ۇلتتى ۇيىتاتىن ورتاق قۇندىلىقتاردى دارىپتەۋدىڭ بەرەرى مول دەپ ەسەپتەيمىز»، – دەدى ماۋلەن اشىمبايەۆ.
ءوز سوزىندە پالاتا سپيكەرى نەگىزگى جانە قازاقستاندىقتاردىڭ مۇددەسى مەن بۇگىنگى سۇرانىستارىنا ساي كەلەتىن قۇندىلىقتار جونىندە ايتتى.
«بۇگىنگى تاقىرىپ تۋرالى ءسوز قوزعاعان كەزدە «ءبىزدىڭ ورتاق قۇندىلىقتارىمىز قانداي» دەگەن زاڭدى ساۋال تۋىندايدى. بۇل تۇرعىدا اركىم ءارتۇرلى كوزقاراس ۇستانۋى مۇمكىن. ءبىراق نەگىزگى قاعيدالار بويىنشا ءبارىمىزدىڭ پىكىرىمىز ءبىر جەردەن شىعادى دەپ ويلايمىن. ءبىزدىڭ قوعامدى تاۋەلسىزدىك، ادىلەتتىلىك، تاتۋلىق، ءبىلىم، ەڭبەك جانە ءوزارا جاۋاپكەرشىلىك سياقتى قۇندىلىقتار بىرىكتىرەدى»، – دەدى ماۋلەن اشىمبايەۆ.
سونىمەن قاتار وتىرىس بارىسىندا ورتاق قۇندىلىقتاردى دارىپتەۋدىڭ تەتىكتەرى تۋرالى دا ءسوز بولدى. قاتىسۋشىلار ۇلتتىق مۇددەگە تابان تىرەيتىن دۇرىس قۇندىلىقتاردى وسكەلەڭ ۇرپاققا، جاستارعا ناسيحاتتاۋ كەزىندە جۇيەلى جۇمىس جۇرگىزۋ جانە ءتيىمدى جولىن تابۋ اسا ماڭىزدى ەكەنىن ايتتى. ودان بولەك، مەدياساراپشىلار مەن كرەاتيۆتى يندۋستريانىڭ وكىلدەرى كونتەنتتەردىڭ جاڭا ۇلگىسىن جانە ولاردى تاراتۋدىڭ زاماناۋي تاسىلدەرىن ۇسىندى.


ماۋلەن اشىمبايەۆ تالقىلاۋ بارىسىندا ايتىلعان ۇسىنىستاردىڭ ءبارى سەناتىڭ الداعى جۇمىسىندا ەسكەرىلەتىنىن جەتكىزدى.
«ادىلەتتى قازاقستان قۇرۋ باستاماسى ەلدىگىمىز بەن ەگەمەندىگىمىز ءۇشىن اسا ماڭىزدى قادام. ونى ىسكە اسىرۋ تەك مەملەكەتتىڭ عانا مىندەتى ەمەس. بۇل – بۇكىل ۇلت بولىپ جۇمىلاتىن ماڭىزدى مىندەت. وسى جولدا ورتاق قۇندىلىقتاردى قالىپتاستىرىپ، ولاردى دارىپتەۋدىڭ ۇتىمدى، زاماناۋي تەتىكتەرى مەن فورمالارىن تابۋدىڭ ءمانى زور. بۇل باعىتتا زيالى قاۋىم، عالىمدار، مەملەكەتتىك ورگاندار، كرەاتيۆتى يندۋستريا مەن ونەر سالاسىندا قىزمەت ەتىپ جۇرگەن ازاماتتار، قوعامدىق ۇيىمدار بىرلەسىپ، ءبارىمىز بىرگە ناتيجەلى ەڭبەك ەتەمىز دەپ سەنەمىن»، – دەگەن سەنات ءتوراعاسى بارشا قاتىسۋشىلارعا بەلسەندىلىك تانىتقاندارى ءۇشىن العىس ءبىلدىردى.
ايتا كەتەيىك، ديالوگ الاڭىنىڭ وتىرىسىنا سەناتورلارمەن بىرگە مەملەكەت جانە قوعام قايراتكەرى دارحان مىڭباي، ق ر ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ، «Bilim Media Group» كومپانياسىنىڭ ديرەكتورى راۋان كەنجەحان ۇلى، مەدياساراپشى ماقپال جۇماباي، مۋلتيپليكاتور، حالىقارالىق كينفەستيۆالدەردىڭ لاۋرەاتى ساقيوللا قاسيەت جانە تاعى باسقا ساراپشىلار قاتىستى.