رەسەي فەدەراسياسىنىڭ دەنساۋلىق ساقتاۋ ءمينيسترى ميحايل مۋراشكو كروكۋس سيتي حوللداعى لاڭكەستىك شابۋىل سالدارىنان زارداپ شەككەندەر سانى ارتقانىن مالىمدەدى، دەپ حابارلايدى Dalanews.kz.
"كروكۋس سيتي حوللداعى تەراكت قۇرباندارىنىڭ سانى 551 ادامعا جەتتى"، - دەدى مينيستر ءوزىنىڭ Telegram ارناسىندا.
ولاردىڭ كوپشىلىگىنە امبۋلاتورلىق كومەك كورسەتىلگەن.
ەسكە سالايىق، 22 ناۋرىزدا كەشكى ۋاقىتتا ماسكەۋدەگى "كروكۋس سيتي حولل" كونسەرت زالىندا تەراكت بولعان ەدى. قارۋ اسىنعان بىرنەشە ادام قاراپايىم تۇرعىندارعا وق جاۋدىرعان.
وسى تۇستا، تەراكت ۇيىمداستىردى دەگەن كۇدىكپەن بىرنەشە ازامات ۇستالدى.
بۇعان دەيىن رەسەيدىڭ تەرگەۋ كوميتەتى تەرروريستەردىڭ بولجامدى ءۇش سىبايلاسىن تۇتقىنداۋدى سۇراعان بولاتىن. ولارعا قاتىستى ءىس ماتەريالدارى باسمان سوتىنا ءتۇستى.
Mash ارناسى ولاردىڭ ەسىمدەرىن جاريا ەتتى.
"ولار - امينچون، ديلوۆار جانە يسرويل يسلوموۆتار (اكەسى مەن ەكى اعايىندى). ولار تەرروريستەرگە كومەك، بايلانىس، لوگيستيكا ۇيىمداستىردى دەگەن كۇدىككە ءىلىندى"، - دەپ جازىلعان ارنا مالىمەتىندە.
سونىمەن قاتار بۇل قاتاردا قىرعىزستان ازاماتى الىشەر كاسيموۆ تا بار.
"باسماننىي اۋداندىق سوتى رف قىلمىستىق كودەكسىنىڭ 205-بابى 3-بولىگىنىڭ "ب" تارماعىندا كوزدەلگەن قىلمىستى جاسادى دەپ ايىپتالعان قىرعىز رەسپۋبليكاسىنىڭ تۋماسى اليشەر حاتاموۆيچ كاسيموۆقا قاتىستى بۇلتارتپاۋ شاراسىن تاڭدادى ( تەرگەۋشىنىڭ ا.ح. كاسيموۆقا قاتىستى ءبىر اي 27 تاۋلىككە، ياعني 2024 جىلدىڭ 22 مامىرىنا دەيىن قاماۋعا الۋ تۇرىندەگى بۇلتارتپاۋ شاراسىن تاڭداۋ تۋرالى ءوتىنىشىن سوت قاناعاتتاندىردى"، - دەلىنگەن حابارلامادا.
