ماسكەۋدەگى تەراكت بويىنشا توعىزىنشى ادام ۇستالدى. ول - 24 جاستاعى نازريماد ليۋتفۋللوي. كۇدىكتى 22 مامىرعا دەيىن قاماۋعا الىندى. وتىرىس جابىق رەجيمدە ءوتتى. بۇل تۋرالى Mash Telegram-ارناسى جازدى، - دەپ حابارلايدى Dalanews.kz.
ارنا مالىمەتىنشە، "كروكۋس" قورشالعان كەزدە ودان قۇجاتتارىن كورسەتۋ تالاپ ەتىلگەن. الايدا ول باس تارتىپ، بالاعات سوزدەر ايتىپ، دورەكىلىك تانىتىپ، پوليسەيلەردىڭ قولىنان قاشىپ شىعۋعا تىرىسقان. كەيىن ول وسى ءۇشىن 15 كۇنگە قاماۋعا الىندى.
"كۇدىكتى يزولياتوردا وتىرعان كەزدە تەرگەۋشىلەر ونىڭ نەگىزگى لاڭكەستەر توبىمەن بايلانىسىن انىقتادى"، - دەپ جازدى ارنا.
Mash مالىمەتىنشە، ۇستالعان كۇدىكتى بويداق، بالالارى جوق. ول ماسكەۋگە تاجىكستاننىڭ پياندجا اۋدانىنان كوشىپ بارعان.
ول "ششەلكوۆسكايا" مەتروسىنىڭ ماڭىنداعى جاتاقحانادا تۇرعان. جوعارى ءبىلىمى بار، ءبىراق ەشبىر جەردە جۇمىس ىستەمەگەن. ونى مەملەكەتتىك ادۆوكات قورعايدى.
ايتا كەتەيىك، 22 ناۋرىزدا بەلگىسىز بىرەۋلەر ماسكەۋدەگى كروكۋس سيتي حولل كونسەرت زالىندا ادامدارعا وق جاۋدىردى. كەيىن كونسەرت زالىندا ءورت شىقتى. سەبەبى وق اتقاندار گراناتا جارعانى بەلگىلى بولدى. ءقازىر نەگىزگى ءتورت كۇدىكتى دە ۇستالدى.
اتىس "پيكنيك" روك-توبىنىڭ كونسەرتىنە بىرنەشە مينۋت قالعاندا باستالعان بولاتىن.
"زالدا جۇرگەن ادامدار اتىستان قورعانۋ ءۇشىن بىردەن جەرگە جاتىپ قورعاندى. كەمىندە 15-20 مينۋت جەردە جاتىپ، اقىرىنداپ سىرتقا شىعا باستادى. كوبى قاشىپ ۇلگەردى"، - دەپ جازدى سول كەزدە رەسەيلىك ارنالار.
بۇعان دەيىن ماسكەۋ قالاسىنىڭ اۋداندىق سوتىنا كروكۋس-ەكسپو ساۋدا ويىن-ساۋىق ورتالىعىندا اۋقىمدى تەرروريستىك اكت جاسادى دەگەن كۇدىكتىلەر اكەلىنگەن بولاتىن. كەيىنىرەك باسمان اۋداندىق سوتى تەرروريستەر توبىنا قاتىستى الدىن الا تەرگەۋ ورگاندارىنىڭ بۇلتارتپاۋ شاراسىن تاڭداۋ تۋرالى ءوتىنىشىن قاراۋعا كىرىستى.
ارتىنشا سوت ۇستالعان كۇدىكتىلەرگە 1 اي 28 تاۋلىك مەرزىمگە، ياعني 2024 جىلعى 22 مامىرعا دەيىن قاماۋعا الۋ تۇرىندەگى بۇلتارتپاۋ شاراسىن تاڭدادى.
