ماسكەۋدەگى "كروكۋس سيتي حوللدا" بولعان لاڭكەستىك ارەكەت سالدارىنان زارداپ شەككەندەر سانى تاعى ارتتى. سوڭعى دەرەكتەرگە سۇيەنسەك، 360 ادامعا كومەك كورسەتىلگەن ەكەن، دەپ حابارلايدى Dalanews.kz.
تاسس مالىمەتىنشە، زارداپ شەككەن 92 ادام اۋرۋحاناعا جاتقىزىلىپ، قازىرگى تاڭدا ولاردىڭ 63ء-ى ۇيىنە ورالعان. ال 205 زارداپ شەگۋشىگە امبۋلاتورلىق كومەك كورسەتىلگەن.
رەسەيدىڭ دەنساۋلىق ساقتاۋ ءمينيسترى ميحايل مۋراشكو زارداپ شەككەندەردىڭ تاعى بىرەۋى قايتىس بولىپ، قازا تاپقانداردىڭ جالپى سانى 140-قا جەتكەنىن اتاپ ءوتتى.
"وكىنىشكە قاراي، اۋىر حالدە بولعان ازاماتتىڭ ءبىرى قايتىس بولدى. دارىگەرلەر ونى امان الىپ قالۋ ءۇشىن قولدان كەلگەننىڭ ءبارىن جاسادى"، - دەدى مۋراشكو.
بۇعان دەيىن قاسىم-جومارت توقايەۆ قازاقستاننىڭ قۇقىق قورعاۋ ورگاندارى قاجەت بولعان جاعدايدا رەسەيگە كومەك كورسەتەتىنىن ايتقان بولاتىن.
ەسكە سالايىق، 22 ناۋرىز كۇنى ماسكەۋدەگى "كروكۋس سيتي حولل" كونسەرت زالىندا تەراكت بولدى. قارۋلانعان بىرنەشە ادام كونسەرت زالىنا باسىپ كىرىپ، ىشىندە جۇرگەن ادامدارعا وق جاۋدىرا باستاعان. سول كۇنى عيماراتتا 6200-گە جۋىق ادام بولعان.
