الەۋمەتتىك جەلىدە الەكسەي پۋچكوۆ ەسىمدى ادامنىڭ جازباسى پايدا بولدى. وندا الاياقتاردىڭ ارەكەتىنەن شارداپ شەككەنىن جازعان. جەلى قولدانۋشىسىنىڭ سوزىنشە، بۇل ىسكە كىنالى كارىم ءماسىموۆتىڭ بۇرىنعى كومەكشىسى بولعان ءارى تانىمال ەسترادا جۇلدىزى ينديرا ەلەمەستىڭ كۇيەۋى كالەلحان ءيمانمادي، - دەپ حابارلايدى Dalanews.kz.

جەلىدە الەكسەي پۋچكوۆ بيلەت ساتاتىن Topbilet سايتىنىڭ نەگىزىن قالاۋشى ءارى ديرەكتورى ەكەنىن، سونىمەن قاتار، «Eurostar entertainment» اتتى حالىقارالىق كونسەرت اگەنتتىگىنىڭ دە ديرەكتورى ەكەنىن كورسەتكەن. ال Facebook پاراقشاسىنداعى جازباسىندا الدانعان ادامداردى ىزدەگەن.

"دوستار، كەشە Instagram-دا جازبا جاريالادىم، ءبىز كالەلحان ءيمانماديدىڭ الاياقتىق ارەكەتتەرىنەن زارداپ شەككەن ادامداردى ىزدەدىك.

ول - كارىم ءماسىموۆتىڭ بۇرىنعى كومەكشىسى ءارى ءانشى ينديرا ەلەمەستىڭ كۇيەۋى. بىرنەشە ادام جاۋاپ قاتتى، ءبىراق ءالى دە مۇنداي وقيعالار بارىن بىلەمىن.

ءسىز نەمەسە ءسىزدىڭ تانىستارىڭىز وسى ادامنان زارداپ شەككەن بولسا، جەكە حابارلاما جازىڭىز. مەنىڭ الدىڭعى جازبامنان كەيىن كالەلحان ونى ءوشىرىپ تاستاۋدى ءوتىندى، ول الداۋ ارقىلى العان اقشاسىن قايتارۋعا ۋادە بەردى. الايدا مۇنىڭ ءبارى تەك بوس ءسوز بولدى"، - دەدى ول.

ءانشى جەلىدەگى وسى اقپاراتقا پىكىر بىلدىرگەن.

"قالەلحان ءيمانمادي كۇيەۋىم ەكەنى راس. ءبىراق بۇل ءىس تۋرالى ەشتەڭە بىلمەيمىن. ءتىپتى، وسى ماسەلە بويىنشا كۇيەۋىمە حابارلاسىپ، ءىستىڭ ءمان-جايىن سۇراعان دا جوقپىن. ويتكەنى ولار – ەرەسەك ادامدار. جولداسىم ەكەۋىمىز ءبىر-بىرىمىزدىڭ تىرلىكتەرىمىزگە ارالاسپايمىز.

الەكسەيدەن اقشا الدى دەگەننىڭ وزىندە مەن قاسىندا بولعان جوقپىن. ول اقشانى كورىپ، قولمەن ۇستاعان ەمەسپىن. سوندىقتان ەشتەڭە ايتا المايمىن. وسى جاعدايعا مەنى ارالاستىرعانى ءۇشىن رەنجىپ قالعانىم راس. مەنى جەكە پاراقشاسىندا بەلگىلەپتى. ءتىپتى شوك الىپ وتىرمىن.

ويتكەنى ونەر جولىندا ءجۇرىپ، تانىمال بولعالى وسىنداي ماسەلەمەن ءبىرىنشى رەت بەتپە-بەت كەلىپ تۇرمىن. وسى تۇرعىدا زاڭدى قولدايمىن. زاڭ قالاي شەشەدى، مەنىڭ دە پوزيسيام سول جاقتا بولادى. كىم كىنالى بولسا دا، ءتيىستى جازاسىن الۋى كەرەك"، – دەدى ينديرا ەلەمەس stan.kz-كە بەرگەن سۇحباتىندا.

ازىرگە ناقتى قانداي وقيعا بولعانى بەلگىسىز. سونىمەن قاتار، قۇزىرلى ورگاندار دا بۇل جايتقا قاتىستى ءالى پىكىر بىلدىرمەدى.