ءماسىموۆ ۇكىمگە جوعارعى سوتقا شاعىمدانۋ مۇمكىندىگىن ءالى پايدالانعان جوق

ساعىنىش سارداروۆا 14 ماۋ. 2024 10:53 3976

كارىم ءماسىموۆ ۇكىمگە جوعارعى سوتقا شاعىمدانۋ مۇمكىندىگىن ءالى پايدالانعان جوق، - دەپ حابارلايدى Dalanews.kz.

Nege.Aqsha ارناسى مالىمەتىنشە، جاقىندا سوت كابينەتىندە ۇقك-نىڭ بۇرىنعى باسشىسىنىڭ ءىسى بويىنشا ماتەريالدار جوعارعى سوتقا تۇسكەنى تۋرالى اقپارات پايدا بولعان. جوعارعى سوت اقپاراتقا قاتىستى پىكىر ءبىلدىردى.

"ك.ك. ماسىموۆكە قاتىستى سوت اكتىلەرىنە كاسساسيالىق تارتىپپەن شاعىم جاسالمادى"، - دەپ جاۋاپ بەرگەن سوت اكىمشىلىگى باسشىسىنىڭ ورىنباسارى بولات جولامانوۆ ارناعا.

ايتا كەتەيىك، بۇعان دەيىن مەملەكەتكە وپاسىزدىق جاساعانى جانە بيلىكتى باسىپ الۋعا تىرىسقانى ءۇشىن سوتتالعان ۇلتتىق قاۋىپسىزدىك كوميتەتىنىڭ بۇرىنعى باسشىسى كارىم ءماسىموۆ كەشىرىم جاساۋ تۋرالى ءوتىنىش بەرگەنى ءمالىم بولدى.

بۇل تۋرالى ق ر ۇلتتىق قاۋىپسىزدىك كوميتەتى Informburo.kz-كە مالىمدەگەن. ءقازىر كارىم ءماسىموۆ سىبايلاس جەمقورلىققا قارسى ءىس-قيمىل اگەنتتىگىنىڭ قاۋلىسى نەگىزىندە استاناداعى ۇقك تەرگەۋ يزولياتورىندا وتىر.

"شىنىندا دا، ول وسى مەكەمەدەن 2024 جىلعى ناۋرىزدا قازاقستان رەسپۋبليكاسى پرەزيدەنتىنىڭ اتىنا كەشىرىم جاساۋ تۋرالى ءوتىنىش جولدادى"، - دەپ حابارلاعان ۇقك.

ۆەدومستۆودا ماسىموۆكە قاتىستى قىلمىستىق كودەكستىڭ 218-بابى، 3-بولىگى، 3-تارماعى جانە 366-بابى، 4-بولىگى بويىنشا سوتقا دەيىنگى تەرگەپ-تەكسەرۋ جالعاسىپ جاتقانى ايتىلدى.

ال 2023 جىلى 24 ساۋىردە استانانىڭ قىلمىستىق ىستەر جونىندەگى مامانداندىرىلعان اۋدانارالىق سوتى ق ر ۇلتتىق قاۋىپسىزدىك كوميتەتىنىڭ ەكس-توراعاسى كارىم ماسىموۆكە، ۇلتتىق قاۋىپسىزدىك كوميتەتى ءتوراعاسىنىڭ ەكس-ورىنباسارلارى ءانۋار سادىقۇلوۆ، داۋلەت ەرعوجين، مارات وسيپوۆكە قاتىستى قىلمىستىق ءىس بويىنشا ۇكىم شىعارعان بولاتىن.

سوت ءىستى "اسا قۇپيا" دەگەن بەلگىمەن قارادى. كارىم ءماسىموۆ ق ر قىلمىستىق كودەكسىنىڭ 175-بابىنىڭ 1-بولىگى، 179-بابىنىڭ 3-بولىگى، 362-بابىنىڭ 4-بولىگىنىڭ 3-تارماعى بويىنشا كىنالى دەپ تانىلىپ، 18 جىل باس بوستاندىعىنان ايرىلدى. سونىمەن قاتار، مەملەكەتتىك قىزمەتتە ءومىر بويى قىزمەت ەتە المايتىنى جانە مۇلكى تاركىلەنەتىنى ايتىلدى. كارىم ءماسىموۆ بۇعان قوسا گەنەرال شەنى مەن مەملەكەتتىك ناگرادالارىنان ايىرىلدى.

ال ونىڭ ورىنباسارى داۋلەت ەرعوجين قىلمىستىق كودەكستىڭ 179-بابىنىڭ 3-بولىگى، 362-بابىنىڭ 4-بولىگى 3-تارماعى بويىنشا كىنالى دەپ تانىلىپ، 15 جىلعا باس بوستاندىعىنان ايىرىلدى.

كەيىن اپەللياسيالىق ساتى ك.ماسىموۆكە، ا. سادىقۇلوۆقا جانە د. ەرعوجينگە قاتىستى ءبىرىنشى ساتىداعى سوت ۇكىمىن قاۋىپسىزدىگى ەڭ جوعارى مەكەمەدەن قاۋىپسىزدىگى ورتاشا مەكەمەدە جازاسىن وتەۋ بويىنشا وزگەرتتى.


ۇسىنىلعان
سوڭعى جاڭالىقتار