نۇر-سۇلتان قالاسىندا Qazaq kuresi قاۋىمداستىعىنىڭ كونگرەسى بولىپ ءوتتى. حالىقارالىق Qazaq kuresi فەدەراسياسى، دۇنيەجۇزىلىك قازاق كۇرەسى فەدەراسياسى جانە رەسپۋبليكالىق قازاق كۇرەسى فەدەراسياسىنىڭ بىرلەسكەن كونگرەسىندە سالا ماماندارىنىڭ قولداۋىمەن Qazaq kuresi قاۋىمداستىعى قۇرىلدى، – دەپ حابارلايدى ايقىن گازەتى.

قاۋىمداستىقتىڭ پرەزيدەنتى قىزمەتىنە كارىم ءماسىموۆ سايلاندى.

كونگرەسس بارىسىندا قاۋىمداستىق پرەزيدەنتى: «ءبىزدىڭ نەگىزگى ماقساتىمىز – قازاق كۇرەسىن وليمپيادا ويىندارىنىڭ قاتارىنا كىرگىزۋ. قاۋىمداستىق ءوز كەزەگىندە حالىقارالىق ۇيىمدارمەن تىعىز بايلانىس جاساي وتىرىپ، قازاق كۇرەسىن وليمپيادا باعدارلاماسىنا ەنگىزۋ جولىندا جۇمىس جاسايدى»،  – دەدى.

سونداي-اق، كارىم قاجىمحان ۇلى وسى ۋاقىتقا دەيىن قازاق كۇرەسى سالاسىندا جۇمىس جاساپ كەلگەن ۇيىمداردىڭ ءبىر قاۋىمداستىق اياسىنا بىرىگۋىن ۇلكەن جەتىستىككە بالادى.

قازاق كۇرەسىن الەمدىك ارەنادا دامىتۋ ماقساتىندا  قاۋىمداستىق قازاقستاننىڭ مادەنيەت جانە سپورت مينيسترلىگى، سىرتقى ىستەر مينيسترلىگى، ۇلتتىق وليمپيادا كوميتەتىمەن ىنتىماقتاستىق تۋرالى مەموراندۋمعا قول قويدى.