مارات ايتەنوۆ اليمەنت قارىزىن تولەمەگەنى ءۇشىن Mercedes اۆتوكولىگىنەن ايىرىلدى، - دەپ حابارلايدى Dalanews.kz.
بۇل تۋرالى استانا قالاسىنىڭ جەكە سوت ورىنداۋشىلارى حابارلادى. ولاردىڭ مالىمەتىنشە، ايتەنوۆ بالالارىنا 23 ميلليون تەڭگە قارىز بولىپ قالعان.
اۆتوكولىك ساتىلىمعا قويىلادى. ودان تۇسكەن قارجى قارىزدى وتەۋگە بەرىلمەك. مارات ايتەنوۆتىڭ بۇرىنعى ايەلى دانا اتەشوۆانىڭ سوزىنشە، ونىڭ بۇرىنعى كۇيەۋى بۇل كولىكتى جاسىرىپ جۇرگەن. ول ءۇشىن ايتەنوۆ بۇرىنعى جەكە سوت ورىنداۋشىمەن كەلىسىپ العان كورىنەدى.
ەسكە سالايىق، بۇعان دەيىن مارات ايتەنوۆكە قاتىستى قىلمىستىق ءىس قوزعالىپ، ول 5 تاۋلىككە قاماۋعا الىنعان بولاتىن.
"سوت وتىرىسى بارىسىندا قۇقىق بۇزۋشى ءوز كىناسىن مويىنداعان جوق. ول بۇرىنعى جۇبايى ونىڭ ءوتىنىشى بويىنشا بالالارىن بەرۋدەن باس تارتىپ، ولاردىڭ قولدارىنان ۇستاپ جىبەرمەگەنىن ءتۇسىندىردى. ول بالالاردى اكەتۋ ءۇشىن ەدەندە وتىرعان ايەلدىڭ اياقتارىنان تارتقان. ول ادەپسىز ءسوز ايتپاعانىن، ونى ۇرماعانىن اتاپ ءوتتى"، - دەدى سوتتا.
سوتتىڭ مالىمەتىنشە، جابىرلەنۋشى بۇرىنعى كۇيەۋى ونى كوشىرۋ كەزىندە زاڭسىز ءجۇرىپ، وعان شابۋىل جاساپ، دەنەسىنە زاقىم كەلتىرگەنىنە شاعىمدانعان. جاسالعان قۇقىق بۇزۋشىلىقتىڭ ءمان-جايلارى اكىمشىلىك قۇقىق بۇزۋشىلىق تۋرالى حاتتامامەن، بەينەجازبامەن، جابىرلەنۋشىنىڭ تۇسىندىرمەلەرىمەن راستالادى.
"اقبتك-نىڭ 73 - بابىنىڭ 1-بولىگىنىڭ سانكسياسى ەسكەرتۋدى نەمەسە 5 تاۋلىككە اكىمشىلىك قاماققا الۋدى كوزدەيدى. جوعارىدا كەلتىرىلگەن ءمان-جايلاردى، سونداي-اق جۇرتشىلىققا تەرىس اسەر ەتەتىن جانە جەكە ادامنىڭ قۇقىقتارىنا قول سۇعاتىن جاسالعان ىس-ارەكەتتىڭ دارەجەسى مەن سيپاتىن ەسكەرە وتىرىپ، قۇقىق بۇزۋشى اقبتك-نىڭ 73-بابىنىڭ 1-بولىگى بويىنشا كىنالى دەپ تانىلدى. وعان جازا تاعايىندالىپ، 5 تاۋلىككە قاماۋعا الىندى. قاۋلى زاڭدى كۇشىنە ەنگەن جوق"، - دەلىنگەن اقپاراتتا.
ارتىنشا مارات ايتەنوۆ ەكس-ايەلى ونى تىستەپ العانى ءۇشىن سوتقا بەرگەن.
ايىپتاۋدىڭ ءمانى
اتەشوۆا ونى ماجبۇرلەپ شىعارۋ پروسەسى بارىسىندا ءۇي يەسىنە قارسىلىق كورسەتىپ، ايتەنوۆتى ۇيگە كىرگىزبەي، جابىرلەنۋشىنى قاساقانا ۇيالى تەلەفونىمەن سوعىپ، ونى تىستەپ العان.
ناتيجەسىندە مارات ايتەنوۆكە دەنە جاراقاتى كەلتىرىلگەن كورىنەدى. اتەشوۆانىڭ كىناسى جابىرلەنۋشىنىڭ، كۋاگەرلەردىڭ ايعاقتارىمەن، سوت-مەديسينالىق ساراپتاما قورىتىندىسىمەن جانە ءىس ماتەريالدارىمەن دالەلدەنگەن.
تاراپتاردىڭ ۇستانىمى
پروكۋرور 30 اەك مولشەرىندە ايىپپۇل تۇرىندە جازا تاعايىنداۋدى سۇرادى.
قورعاۋشى تاراپ وقيعا مەن قىلمىستىق قۇقىق بۇزۋشىلىق قۇرامىنىڭ بولماۋىنا بايلانىستى ءىس بويىنشا ءىس جۇرگىزۋدى توقتاتۋدى سۇرادى.
قانداي جازا تاعايىندالدى؟
قك-نىڭ 108-1-بابى 1-بولىگىنىڭ سانكسياسى 200 اەك-كە دەيىنگى مولشەردە ايىپپۇل سالۋ نە سول مولشەردە تۇزەۋ جۇمىستارى، نە 200 ساعاتقا دەيىنگى مەرزىمگە قوعامدىق جۇمىستارعا تارتۋ، نە 50 تاۋلىككە دەيىنگى مەرزىمگە قاماققا الۋ تۇرىندەگى جازانى كوزدەيدى.
سوت قىلمىستىق جاۋاپتىلىق پەن جازانى جەڭىلدەتەتىن ءمان-جايلار رەتىندە جاس بالالاردىڭ بولۋىن جانە سوتتىلىعىنىڭ بولماۋىن تانىدى. اۋىرلاتاتىن ءمان-جايلار انىقتالعان جوق.
جاسالعان تەرىس قىلىقتىڭ ءمان-جايلارىن جانە ونىڭ اۋىرلىعىن ەسكەرە وتىرىپ، سونداي-اق سوتتالۋشىنىڭ جەكە كاسىپكەر بولىپ تابىلاتىنىن، ونىڭ اسىراۋىندا 3 جاس بالاسىنىڭ بار ەكەنىن جانە جازانىڭ وزگە ءتۇرىن تاعايىنداۋ ونىڭ بالالارىنىڭ ءومىرى مەن تاربيەسى جاعدايلارىنا اسەر ەتۋى مۇمكىن ەكەنىن ەسكەرە وتىرىپ، سوت سوتتالۋشى اتەشوۆاعا 20 اەك مولشەرىندە ايىپپۇل تۇرىندەگى جازا تاعايىندادى.
