نىساننىڭ اشىلۋ سالتاناتىنا قاتىسقان اۋداندىق ىشكى ساياسات، مادەنيەت جانە تىلدەردى دامىتۋ ءبولىمىنىڭ باسشىسى پ.ەسەنبەكوۆ سپورت الاڭىنا ەسىمى بەرىلگەن ەسەنگەلدى مۇستاپا ۇلى تۋرالى ءوز ەستەلىكتەرىمەن ءبولىستى.
"ەسەكەڭ وسى اۋىلدىڭ كوركەيۋىنە بار كۇشىن جىگەرىن ارناعان اتپال ازامات ەدى. توقىراۋ جىلدارى جارىق، جىلۋ، سۋسىز قالعان كەزدەردە اۋىل ازاماتتارىنىڭ باسىن قوسىپ، كوپتەگەن يگى باستامالاردىڭ ۇيىتقىسى بولا بىلگەن. مىنە، اكەنىڭ ءىزىن جالعاپ بالالارى اۋدان ورتالىعىنان شالعايدا جاتقان اۋىلدى كورىكتەندىرۋگە ۇلەسىن قوسۋدا" – دەدى پ.ەسەنبەكوۆ.
ءسوز كەزەگىن العان جاڭاجول اۋىلدىق وكرۋگىنىڭ اكىمى مۇقان بايىمبەتوۆ سەيداقوۆتار اۋلەتىنە اكىمشىلىك تاراپىنان ريزاشىلىعىن ايتىپ، ەلباسىمىزدىڭ "تۋعان جەر" باعدارلاماسى اياسىندا كاسىپكەرلەردىڭ دەمەۋشلىگىمەن وكرۋگتە كوپتەگەن نىساندار اشىلعاندىعىن اتاپ ءوتتى. سونداي-اق، نىساننىڭ اشىلۋنا وراي فۋتبولدان وتكەن جارىستىڭ جەڭىمپازدارىن ماراپاتتادى.
ايتا كەتەيىك، سپورت الاڭىنا ەسىمى بەرىلگەن سەيداقوۆ ەسەنگەلدى مۇستاپا ۇلى 1945 جىلى وڭتۇستىك قازاقستان وبلىسى، ماقتاارال اۋدانىندا دۇنيەگە كەلگەن. 1953 جىلى وسى اۋدانداعى ق.قايسەنوۆ مەكتەبىنىڭ 1-سىنىبىنا بارىپ، 1963 جىلى قازىرگى ج.نۇرلىبايەۆ اۋىلىندا ى.التىنسارين مەكتەبىن ءتامامدادى.
الماتىنىڭ زووۆەتەرينارلىق ينستيتۋتىن ءبىتىرىپ، 1973 جىلى ماقتاارال اۋدانىنىڭ ماقتاارال ساۆحوزىنا مال دارىگەرى بولىپ ەڭبەك جولىن باستايدى. 1986 جىلدان باستاپ 19 جىل بويى قاراكول قويىن وسىرۋدەن ۇزدىك بولعان جەڭىس ساۆحوزىندا باس مال دارىگەرى بولىپ قىزمەت ەتەدى. ول ءوزىنىڭ جۇمىس ورتاسىندا ەرەكشە ۇستانىمى مەن تالابى بار بىلىكتى مامان بولا بىلگەن. ماسەلەن، ەسەنگەلدى مۇستاپا ۇلىنىڭ تۇسىندا جەڭىس ساۆحوزىنداعى قاراكول قوي شارۋاشىلىعى - ەلىمىزدىڭ قوي شارۋاشىلىعىندا التىنعا پارا پار بولعان ەلتىرىنى وندىرۋدە الدىڭعى قاتارلى شارۋاشىلىقتاردىڭ قاتارىندا بولعان.
