ماقتا وڭدەۋدەن وبلىستا كوش باستايتىن ءبىر عانا "مىرزاكەنت" ماقتا وڭدەۋ زاۋىتىنىڭ وزىندە بوس جۇمىس ورىندارىنىڭ سانى 500-گە جەتەدى. زەرتحاناشى، ەلەكترشى، تەمىر ۇستاسى، كۇزەتشى، وپەراتور سياقتى مامانداردى زاۋىت جۇمىسقا تۇرۋعا شاقىرادى. سونداي-اق، جۇمىس ۇسىنىپ وتىرعان بىرنەشە ءىرى كاسىپورىن بار. سونداي-اق، اۋدان تۇرعىندارى ماقتا تالشىعىن وڭدەۋ، اۆتوكولىكتەردىڭ ەلەكترلىك قۇرىلعىلارىن جوندەۋ، شاشتاراز شەبەرى، تىگىنشى، اسپازشى، اۋىل شارۋاشىلىعى وندىرىسىندەگى ماشينيست، جەمىس-كوكونىس ءوندىرۋشى، ەلەكتر گازىمەن دانەكەرلەۋشى، ۆيزاجيست، ەلەكتروندى ەسەپتەۋىش ماشينالاردىڭ وپەراتورى سياقتى قىسقا مەرزىمدى كۋرستاردا تەگىن ءبىلىم الا الادى جانە سەرتيفيكاتتار بەرىلەدى.
"اۋدان تۇرعىندارى "ورلەۋ" جوباسىنا قاتتى قىزىعۋشىلىق بىلدىرۋدە. بۇگىن سول جوبا بويىنشا مالىمەت الۋعا كەلگەن تۇرعىنداردىڭ قاراسى كوپ" - دەيدى اۋدان اكىمىنىڭ ورىنباسارى التىن ەشانقۇلوۆا. ايتا كەتەيىك، بوس جۇمىس ورىندارىنىڭ جارمەڭكەسىنە مىڭعا جۋىق ادام قاتىستى. جۇمىس ىزدەپ كەلۋشىلەر مەن الەۋمەتتىك باعدارلامالار تۋرالى سۇراۋشىلارعا اۋدانداعى ءتۇرلى كاسىپورىنداردىڭ ماماندارى قىزمەت كورسەتىپ، تۇيىندەمەلەرىن الىپ قالدى. بوس جۇمىس ورىندارىنا قۇجات قابىلداۋ جالعاسا بەرمەك.
