قۇرىلىسى كەلەر جىلى باستالاتىن اسفالت-بەتون ءوندىرۋ جوباسىنىڭ ينۆەستورى گرەسيالىق NIOVI S.A كومپانياسى قۇرىلتايشىسى بولىپ كەلەتىن «Soldatos» ءجشس-نىڭ باس ديرەكتورى ا.شىنتايەۆتى وبلىس اكىمى ج.تۇيمەبايەۆ ارنايى قابىلداپ الداعى جۇمىسىنا ساتتىلىك تىلەدى.
بۇگىندە مەملەكەت تاراپىنان ينۆەستورلارعا قولايلى جاعداي جاسالعانىن ايتقان اكىم وڭتۇستىك - ەكونوميكالىق الەۋەتى زور، تۇراقتى دامىپ كەلە جاتقان ءوڭىر ەكەنىن اتاپ ءوتتى.
«ايماق - ورتا ازيا، تاياۋ شىعىس پەن ەۋروپا ەلدەرىن بايلانىستىراتىن جولداردىڭ قيىلىسىندا ورنالاسقاندىقتان بىزدە شەكارالىق ساۋدا-ساتتىق پەن ەكسپورتتىق ءوندىرىس دامىپ كەلەدى. سونداي-اق، وبلىستا 11 يندۋستريالدى ايماق پەن جەڭىل ونەركاسىپ باعىتىنداعى ءبىر ارنايى ەكونوميكالىق ايماق بار. وبلىستا ينۆەستيسيا تارتۋ جانە ينۆەستورلارعا ءبىر تەرەزە قاعيداسى بويىنشا قىزمەت كورسەتەتىن ايماقتىق دامۋ ينستيتۋتتارى جۇمىس جاسايدى. ينستيتۋتتار كاسىپكەرلەرگە كەڭەس بەرەدى جانە قارجىلىق پەن ينفراقۇرىلىمدىق كومەك كورسەتەدى»، - دەدى ءوڭىر باسشىسى.
ءوز كەزەگىندە ءسوز العان كومپانيا باسشىسى بۇعان دەيىن اۋداندا ءموبيلدى اسفالت زاۋىتىن ىسكە قوسىپ، قىزىلقۇم اۋىلدىق وكرۋگىندە ورنالاسقان ينسپەكتورلىق جولدارعا اسفالت بەرىپ كەلگەنىن جەتكىزدى. سونىمەن بىرگە ول ەكىنشى جەلىسىن كەلەر جىلدىڭ جاز ايىندا اياقتاۋدى جوسپارلاپ وتىرعانىن اتاپ ءوتتى.
«Soldatos» ءجشس-نىڭ ينۆەستورلارى ماقتاارال اۋدانىنداعى جوبادان بولەك، سارىاعاشتا ساعاتىنا 150 توننا، ال تۇركىستان قالاسىندا ساعاتىنا 200 توننا اسفالت-بەتون شىعاراتىن زاۋىت سالۋدى جوسپارلاپ وتىر.
ايتا كەتەيىك، اۋداندا سىرتقى ينۆەستيسيادان بولەك، ىشكى ينۆەستيسيانىڭ ەسەبىنەن وڭدەۋ زاۋىتى، گيگيەنالىق زاتتار مەن پوليەتيلەن شىعاراتىن ءوندىرىس زاۋىتتارىنىڭ جوبالارى دا جۇزەگە اسپاق. 38 گەكتار جەردى الىپ جاتقان اۋداننىڭ يندۋستريالدى ايماعىندا جۇمىس ىستەپ تۇرعان «بەرەكە» ماقتا زاۋىتىنان باسقا، مۇندا كەلەر جىلى 4 جوبا ىسكە اسىرىلادى دەپ جوسپارلانۋدا.
وقو اكىمىنىڭ باسپا ءسوز قىزمەتى
