ماقتارال اۋدانى قازىبەك بي اۋىلدىق وكرۋگىندەگى "بەرەكە-ماقتا" اۋىلشارۋاشىلىعى وندىرىستىك كووپەراتيۆى بيىل تولاعاي تابىستارعا كەنەلىپ وتىر. ولاي دەۋگە نەگىز دە جوق ەمەس.



بيىلدىڭ وزىندە كووپەراتيۆ 5740 گەكتارعا ماقتا ەگىپ، ءار گەكتارىنان 24-25 سەنتنەردەن ءونىم الۋدا. ماقتانىڭ العاشقى قول تەرىم جۇمىستارىن قىزدىرىپ جاتقان كووپەراتيۆتە بۇگىندە 100-گە جۋىق ادام مەزگىلدىك جۇمىستارعا جۇمىلدىرىلىپتى. تەرىمشىلەرگە ماقتانىڭ ءار كەلىسىنە 25 تەڭگەدەن تولەنۋدە.

– قول تەرىم جۇمىستارىن جۇرگىزگەن ءار ادام كۇندەلىكتى 5-6 مىڭ تەڭگە تاۋىپ وتىر. جۇمىس اسا قيىن ەمەس. ماقتا تەرىمى كەزىندە وتباسىمىزدى باعىپ، تابىس تابۋعا مۇمكىندىك بەرگەن كووپەراتيۆ باسشىلارىنا العىس ايتامىن، – دەيدى قازىبەك بي اۋىلىنىڭ تۇرعىنى مۋكتابار ىرزيمەتوۆا.

جالپى سانى 188 دانا تەحنيكاسى بار كووپەراتيۆ "وڭتۇستىك" ايماقتىق ينۆەستيسيالىق ورتالىعىنان 2016 جىلى 25 ميلليون تەڭگە، ال بيىل 100 ميلليون تەڭگە نەسيە الىپتى. كووپەراتيۆ ءتوراعاسى بۇل مۇمكىندىكتەرگە ءبىر اۋىزدان بىرىگۋدىڭ ارقاسىندا قول جەتكىزىپ وتىرمىز دەيدى.

– 2016 جىلى قازىبەك بي اۋىلدىق وكرۋگىندەگى 794 شارۋا قوجالىعى ءبىر اۋىزدان بىرىگىپ، كووپەراتيۆ قۇردىق. ءسويتىپ، ءار شارۋاقوجالىعىنا تيەسىلى جەرلەردى بىرىكتىردىك. بىرىگۋدىڭ ارقاسىندا بيىلدىڭ وزىندە ليزينگكە سۋ جاڭا 12 تراكتور الدىق. جانار-جاعارماي مەن تىڭايتقىشتارعا دا جەڭىلدەتىلگەن باعادا قولجەتكىزىپ وتىرمىز. الداعى ۋاقىتتا ەگىستىك كولەمىن ۇلعايتىپ، تابىسىمىزدى ەسەلەي تۇسەمىز، – دەيدى كووپەراتيۆ ءتوراعاسى مۇرات قۇربانوۆ.

2016 جىلى قۇرىلعان كووپەراتيۆتىڭ 6832 گەكتار جەرى بار. ونىڭ ىشىندە 5740 گەكتار ماقتا، 660 گەكتار باقشا، 2 گەكتار كوكونىس، 40 گەكتار جاڭا جوڭىشقا، 150 گەكتار ەسكى جوڭىشقا، 229 گەكتار داندىك جۇگەرى، 11 گەكتار سۇرلەمدىك جۇگەرى ەگىلگەن.

 

وقو اكىمىنىڭ باسپا ءسوز قىزمەتى

 

https://dalanews.kz/30207