بيىل ماقتارال اۋدانىنداعى كوكتەمگى دالا جۇمىستارىنا مەملەكەت تاراپىنان 5 مىڭ توننادان استام جانار جاعارماي بولىنسە، بۇگىندە ونىڭ 3900 تونناسى شارۋالارعا ۇلەستىرىلىپ بەرىلگەن.
بيىل وڭىردە تۇقىمدىق شيت تاپشىلىعى سەزىلگەن جوق. اۋدان اكىمى ج. بەيسەنبايەۆتىڭ تاپسىرماسىمەن ارنايى جۇمىس توبى قۇرىلىپ، كوكتەمگى دالا جۇمىستارىنا قاجەتتى 3 مىڭ توننا شيت دايىندالعان بولاتىن. بۇدان بولەك، اۋدانعا جۇڭگو مەن تۇركيا ەلدەرىنەن دە تۇقىمدىق شيت تاسىمالدانۋدا. قازىرگى تاڭدا شارۋالار تۇقىمدىق ءشيتتىڭ كەلىسىن سورتىنا قاراي 250-300 تەڭگە ارالىعىندا ساتىپ الىپ جاتىر.
ايتا كەتەيىك، بىلتىر ماقتارال اۋدانىنىڭ قىرمانىنا 219 مىڭ توننادان استام "اق التىن" جينالعان بولاتىن. ماقتا داقىلىنىڭ ورتاشا ونىمدىلىگى ءار گەكتاردان 23،1 سەنتنەردى قۇرادى. جينالعان ءونىمنىڭ 118 مىڭ تونناسى كومباينمەن، قالعانى قول كۇشىمەن تەرىلدى. ناۋقانعا 641 تەرىمشىلەر بريگاداسى، 25 مىڭعا تارتا تەرىمشى، 290 كومباين جۇمىلدىرىلعان ەدى.
بىلتىر وڭىردە ماقتا باعاسى 165 تەڭگەدەن باستالىپ، 178 تەڭگەگە دەيىن كوتەرىلدى. جەر ەمگەن شارۋالار باعانىڭ بيىل دا جوعارى بولاتىنىنا سەنىم ارتىپ وتىر. ءونىم كولەمىن ارتتىرۋ ءۇشىن اۋداندا ارنايى سەمينار - كەڭەس ۇيىمداستىرىلىپ، ديقاندارعا ساپالى تۇقىم، ارنايى كۇتىم جولدارى مەن زيانكەستەرگە قارسى كۇرەس شارالارىنىڭ تيىمدىلىگى ءتۇسىندىرىلدى.
ماقتارال اۋدانى اكىمىنىڭ باسپا ءسوز قىزمەتى
