بۇگىن ماقتاارال اۋدانىندا كوپتىڭ ماڭگىلىككە ەسىندە قالاتىن، رۋحاني بايلىق الاتىن «ساعىندىرعان اندەر-اي» اتتى وبلىستىق ۆوكالدى-اسپاپتى انسامبلدەرىنىڭ ءان بايقاۋى ءوتتى. جۇرەكتەرگە اننەن تۇمار تاعاتىن بايقاۋدى ماقتاارال اۋدانى اكىمىنىڭ ورىنباسارى التىن ەشانقۇلوۆا اشىپ بەرىپ، قاتىسۋشى انسامبلدەرگە ساتتىلىك تىلەدى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
تۇركىستان وبلىستىق «ساعىندىرعان اندەر-اي» بايقاۋىنا 12 اۋداننان 14 انسامبل قاتىستى. بايقاۋ شارتى بويىنشا ءبىرىنشى كەزەڭدە 80-90 جىلدارداعى رەترو اندەردى ورىنداسا، ەكىنشى كەزەڭدە ەركىن تاقىرىپتاعى اندەر ورىندادى.
بايقاۋعا تۇركىستان وبلىستىق مادەنيەت جانە حالىق شىعارماشىلىق ورتالىعىنىڭ مادەني ۇيىمداستىرۋشى مامانى، ق ر مادەنيەت سالاسىنىڭ ۇزدىگى زاعيپا ءومىرزاقوۆا، ماقتاارال اۋداندىق مادەنيەت ءۇيىنىڭ ۇجىم جەتەكشىسى دۇيسەنبى جۇمابايەۆ جانە قۇرمانبەك جانداربەكوۆ اتىنداعى دراما تەاترىنىڭ دىبىس رەجيسەرى، مۋزىكا وڭدەۋشى ەرجان باكيروۆ قازىلىق ەتتى.
بايقاۋ قورىتىندىسى بويىنشا ءادىل قازىلار القاسىنىڭ شەشۋىمەن باس جۇلدە «تارلان» ۆوكالدى-اسپاپتى انسامبلىنە (تۇركىستان قالاسى) بۇيىرىپ، ارنايى ديپلوم مەن 500 مىڭ تەڭگە قارجىلاي سىيلىققا يە بولدى. 1-ورىندى «قازىعۇرت Bend» ۆوكالدى-اسپاپتى ءانسامبلى (قازىعۇرت اۋدانى)، 2-ورىندى «اراي» حالىقتىق ۆوكالدى-اسپاپتى ءانسامبلى (ورداباسى اۋدانى) جانە «ART&MUSIC» ۆوكالدى-اسپاپتى ءانسامبلى (تۇلكىباس اۋدانى)، 3- ورىندى «سارىاعاش» ۆوكالدى-اسپاپتى ءانسامبلى (سارىاعاش اۋدانى) جانە «مەرەي» ۆوكالدى-اسپاپتى ءانسامبلى (ماقتاارال اۋدانى) يەلەندى.
تۇركىستان وبلىستىق مادەنيەت باسقارماسىنىڭ ارنايى جۇلدەسى جەتىساي اۋدانىنان كەلگەن «بىرلىك» ۆوكالدى-اسپاپتى انسامبلىنە بۇيىردى. سونىمەن قاتار ماقتاارال اۋدانى اكىمىنىڭ ارنايى جۇلدەسى سايرام اۋدانىنان كەلگەن«اقسۋ اۋەندەرى» حالىقتىق ۆوكالدى-اسپاپتى انسامبلىنە بۇيىردى. بايقاۋعا بەلسەنە قاتىسقان باسقا دا ونەر ۇجىمدارى ارنايى ديپلوممەن ماراپاتتالدى.
