ماقتاارال اۋدانىندا ماقتا-توقىما كلاستەرٸن دامىتۋدا 2024-2030 جىلعا دەيٸن جالپى قۇنى 70 ملرد. تەڭگەنٸ قۇرايتىن 8 ٸرٸ جوبانى جٷزەگە اسىرۋ جوسپارلانعان. وسى ارقىلى 3020 ادام جۇمىسپەن قامتىلىپ, بيۋدجەتكە قوسىمشا 1 ملرد. 862 ملن. تەڭگە سالىقتىق تٷسٸمدەر تٷسەدٸ دەپ بولجانۋدا. بۇل تۋرالى وبلىس ەكٸمدٸگٸندە ماقتاارال اۋدانىنىڭ 2030 جىلعا دەيٸنگٸ ەكونوميكالىق دامۋ ستراتەگيياسى تالقىلانعان مەجٸلٸستە ايتىلدى. تٷركٸستان وبلىسىنىڭ ەكٸمٸ دارحان ساتىبالدى ماقتاارالدىڭ دامۋ قارقىنىن ارتتىرۋ كەرەكتٸگٸن ايتىپ, جاۋاپتىلارعا تيٸستٸ تاپسىرمالار بەردٸ, دەپ حابارلايدى Dalanews.kz تٷركٸستان وبلىسى ەكٸمٸنٸڭ باسپاسٶز قىزمەتٸنە سٸلتەمە جاساپ.
– بٸز ماقتاارال اۋدانىن دامىتۋدا نەگٸزگٸ باسىمدىقتاردى ايقىنداپ, جوسپارلاپ الماساق, ەكونوميكالىق دامۋ بولمايدى. ناقتى ۇسىنىستار از. دامۋ جوسپارىن ناقتىلاپ, كٷشەيتە تٷسكەن جٶن. ماقتا كلاستەرٸ, اۋىل شارۋاشىلىعىن ەرتاراپتاندىرۋ, سۋ ٷنەمدەۋ تەحنولوگييالارىن ەنگٸزۋ ماڭىزدى. اۋىل شارۋاشىلىعى داقىلدارىن تەرەڭ ٶڭدەۋگە باسىمدىق بەرٸلسٸن. لوگيستيكالىق ەلەۋەتتٸ كٶتەرۋ دە نازارعا الىنسىن. جۇمىستى جانداندىرىڭىزدار, – دەگەن دارحان ساتىبالدى جوسپاردى جەتٸلدٸرۋدٸ تاپسىردى.
ٶنەركەسٸپ سالاسىنداعى 11 جوبانىڭ, 7-ەۋٸ يندۋستريالدى ايماقتا ورنالاسا, 4 جوبا ارنايى ايماقتاردا جٷزەگە اسپاق. ماقتاارال اۋدانى يندۋستيرالدى ايماعىنىڭ جالپى جەر اۋماعى – 24 گەكتار. قازٸرگٸ تاڭدا اتالعان ايماقتا قۇنى 3 ملرد. 450 ملن. تەڭگەنٸ قۇرايتىن, 137 جۇمىس ورنىن قامتيتىن 4 جوبا جۇمىس ٸستەۋدە. 2024-2030 جىلدارى ارالىعىنا جالپى قۇنى 4 ملرد. 740 ملن. تەڭگەنٸ قۇرايتىن, 7 جوبا جوسپارلانىپ, 100-گە جۋىق جۇمىس ورنى اشىلادى دەپ بولجانۋدا.
ەگٸن شارۋاشىلىعى داقىلدارىن ەرتاراپتاندىرۋ بويىنشا 2030 جىلعا دەيٸن ماقتانى 30 مىڭ گەكتارعا مٶلشەرلەپ, ياعني 3,7 مىڭ. گەكتارعا ازايتىپ, ٶنٸمدٸلٸكتٸ 60 تسەنتنەرگە ۇلعايتۋ جوسپارلانىپ وتىر. ماقتا داقىلىنىڭ 15 مىڭ گەكتارىن سۋ ٷنەمدەۋ تەحنولوگيياسىمەن ەگۋ مەجەلەنگەن. جٷگەرٸ داقىلىن 2,6 مىڭ گەكتاردان 4,1 مىڭ گەكتارعا كٶبەيتۋ, ماش داقىلىن 0,2 مىڭ گەكتاردان 2,1 مىڭ گەكتارعا كٶبەيتۋ جوسپارعا ەنگٸزٸلگەن. 2025 جىلى «Agro Gruz» لوگيستيكالىق كومپانيياسى ارقىلى 10 مىڭ توننا ٶنٸمدٸ ساقتاۋعا ارنالعان قويما اشۋ جوسپارلانىپ وتىر. تۇت اعاشى القابى ۇلعايادى.
