تەگىن جازدىق مەكتەپكە باعدارلامالاۋ بويىنشا قازاقستاننىڭ تۇكپىر-تۇكپىرىنەن 200-دەن استام قاتىسۋشى كەلدى. اشىلۋ سالتاناتىندا ءبىلىم جانە عىلىم ۆيسە-مينيسترى ايبات ءىلياسوۆ، قانىش ساتبايەۆ اتىنداعى قازاق ۇلتتىق تەحنيكالىق ۋنيۆەرسيتەتىنىڭ رەكتورى مەيرام بەگەنتايەۆ، «شيەۆرون» كومپانياسىنىڭ وكىلدەرى مەن قازاقستاندىق جانە حالىقارالىق كومپانيالاردا جۇمىس ىستەيتىن nFactorial School مەكتەبىنىڭ تۇلەكتەرى قاتىستى.
اتالعان ءىس-شارانى nFactorial School مەكتەبىنىڭ نەگىزىن قالاۋشى، pinemelon.com امەريكالىق ستارتاپىنىڭ باسقارۋشى ديرەكتورى، IT-كاسىپكەر، بولاشاقشى جانە پرينستون ۋنيۆەرسيتەتىنىڭ تۇلەگى ارمان سۇلەيمەنوۆ ۇيىمداستىردى. ارماننىڭ ءبىلىم بەرۋ جوبالارى 2015 جىلدان بەرى 650-دەن استام قازاقستاندىق IT-مامانىن دايىنداپ شىعارعان بولاتىن.
جاس IT-كاسىپكەردىڭ ايتۋى بويىنشا، nFactorial School ميسسياسى – 10 000 جوعارى بىلىكتى IT-مامانىن دايىنداۋ جانە بۇكىل الەمدە ءجۇز ميلليونداعان ادامعا «Made in Kazakhstan» تاڭباسى بار باعدارلامالىق جاساقتاما ونىمدەرىن ۇسىنا وتىرىپ، قازاقستاندى الەمنىڭ «تەحنولوگيالىق» قارتاسىندا تانىستىرۋ.
«ەلىمىزدەگى IT ماماندارىنىڭ سانىن كوبەيتۋ ءۇشىن مەملەكەت بۇل سالانى جاستارعا مەكتەپ كەزىنەن وقىتۋ كەرەك دەپ ويلايمىن. ياعني باعدارلامالاۋدى تەك جوعارعى وقۋ ورىندارىندا عانا وقىتپاي، مەكتەپ باعدارلاماسىنا دا ەنگىزسە جاستاردىڭ بۇل سالاعا دەگەن قىزىعۋشىلىعى ارتىپ، IT ماماندارىنىڭ سانى ءبىرشاما كوبەيەتىن ەدى. nFactorial-داعى 3 اي ىشىندە قاتىسۋشىلار ۆەب-باعدارلامالاۋ جانە ديزاين نەگىزدەرىن ۇيرەنەدى. وقۋ بارىسىندا قاتىسۋشىلارعا Meta، Google، Apple، Amazon، Reddit، Deepmind، Stripe سياقتى تەحنولوگيالىق الىپ كومپانيالاردا جانە تمد ەلدەرىنىڭ ءىرى IT كومپانيالارىندا جۇمىس ىستەيتىن nFactorial School تۇلەكتەرى ءتالىم بەرىپ، IT ونىمدەرىن حالىقارالىق نارىققا شىعارۋ جانە اقشالاي پايدا اكەلۋ جولدارىن تانىستىرادى»،-دەدى ايدار نۇعىمانوۆ.
ءبىلىم جانە عىلىم ءمينيسترى ايبات ءىلياسوۆتىڭ ايتۋىنشا، IT ءبىلىم بەرۋ جوبالارى مەملەكەتتىڭ دامۋىندا ماڭىزدى ستراتەگيالىق جانە الەۋمەتتىك ءرول اتقارادى.
«پرەزيدەنت توقايەۆ ايتىپ وتكەندەي، ءبىزدىڭ ەلىمىزگە جاس، ءبىلىمدى جانە ىنتالى كادرلار قاجەت جانە ەلدىڭ بارلىق ايماعىنان كەلگەن 200 دارىندى جاسقا ارنالعان جازعى باعدارلامالاۋ مەكتەبى 10 000 جوعارى بىلىكتى IT- ماماندى ازىرلەۋ جولىنداعى تاعى ءبىر قادام»، - دەدى مەكتەپتىڭ اشىلۋ سالتاناتىندا ءسوز العان ۆيسە مينيستر.
شارانىڭ باس دەمەۋشىسى «شيەۆرون» كومپانياسىنىڭ وكىلى لەيلا ايتمۇحانوۆا جوو-دا مۇنداي پايدالى ءىس-شارالاردى كوبىرەك وتكىزۋ قاجەتتىگىن، جاستاردىڭ تالپىنىسى مەن قىزىعۋشىلىعىنىڭ زور ەكەندىگىن اتاپ ءوتتى.
ەل پرەزيدەنتى قاسىم-جومارت توقايەۆ جولداۋىندا «قازىرگى زاماندا باسەكەلەستىكتەگى باسىم باعىتتاردىڭ ءبىرى سيفرلاندىرۋ. قازاقستان ءۇشىن دە زاماناۋي سيفرلىق تەحونولوگيانى ەنگىزۋ مەن قولدانۋ ماڭىزدى. وسى ورايدا ءبىز شەتەلدىك سەرىكتەستەرىمىزبەن بەلسەندى جۇمىس ىستەۋىمىز كەرەك. سونىڭ ىشىندە وتاندىق IT سەكتوردى ىلگەرىلەتۋدى دە ۇمىتپاعان ءجون.
سيفرلاندىرۋ تۋرالى ۇلتتىق جوبا اياسىندا كەم دەگەندە 100 مىڭ جوعارى ساناتتى IT مامان ازىرلەۋىمىز كەرەك. ەكسپورتتىق جانە سيفرلىق سالا بويىنشا تاۋار قىزمەتى 2025 جىلعا قاراي كەم دەگەندە 500 ملن اقش دوللارىنا جەتۋى ءتيىس. مەملەكەتتىك سەكتوردى سيفرلاندىرۋدا وسى جانە وزگە دە مىندەتتەردى قايتا قاراستىرۋ قاجەت»-دەپ اتاپ وتكەن بولاتىن.
جازعى جوبانى ۇيىمداستىرۋشىلاردىڭ ماقساتى دا IT سالاسىندا ۇزدىك مامانداردى ازىرلەۋ. جوبا ناتيجەسىندە قاتىسۋشىلار 150-دەن استام قازاقستاندىق ءونىم ازىرلەيدى جانە ەڭ ۇزدىكتەرى ينۆەستورلار مەن كاسىپكەرلەرگە ستارتاپ پرەزەنتاسيا رەتىندە ۇسىنىلاتىن بولادى.
