Tegin jazdyq mektepke baǵdarlamalaý boiynsha Qazaqstannyń túkpir-túkpirinen 200-den astam qatysýshy keldi. Ashylý saltanatynda Bilim jáne ǵylym vitse-ministri Aibat Iliiasov, Qanysh Sátbaev atyndaǵy Qazaq ulttyq tehnikalyq ýniversitetiniń rektory Meiram Begentaev, «Shevron» kompaniiasynyń ókilderi men qazaqstandyq jáne halyqaralyq kompaniialarda jumys isteitin nFactorial School mektebiniń túlekteri qatysty.
Atalǵan is-sharany nFactorial School mektebiniń negizin qalaýshy, pinemelon.com amerikalyq startapynyń basqarýshy direktory, IT-kásipker, Bolashaqshy jáne Prinston ýniversitetiniń túlegi Arman Súleimenov uiymdastyrdy. Armannyń bilim berý jobalary 2015 jyldan beri 650-den astam qazaqstandyq IT-mamanyn daiyndap shyǵarǵan bolatyn.
Jas IT-kásipkerdiń aitýy boiynsha, nFactorial School missiiasy – 10 000 joǵary bilikti IT-mamanyn daiyndaý jáne búkil álemde júz milliondaǵan adamǵa «Made in Kazakhstan» tańbasy bar baǵdarlamalyq jasaqtama ónimderin usyna otyryp, Qazaqstandy álemniń «tehnologiialyq» qartasynda tanystyrý.
«Elimizdegi IT mamandarynyń sanyn kóbeitý úshin memleket bul salany jastarǵa mektep kezinen oqytý kerek dep oilaimyn. Iaǵni baǵdarlamalaýdy tek joǵarǵy oqý oryndarynda ǵana oqytpai, mektep baǵdarlamasyna da engizse jastardyń bul salaǵa degen qyzyǵýshylyǵy artyp, IT mamandarynyń sany birshama kóbeietin edi. nFactorial-daǵy 3 ai ishinde qatysýshylar veb-baǵdarlamalaý jáne dizain negizderin úirenedi. Oqý barysynda qatysýshylarǵa Meta, Google, Apple, Amazon, Reddit, Deepmind, Stripe siiaqty tehnologiialyq alyp kompaniialarda jáne TMD elderiniń iri IT kompaniialarynda jumys isteitin nFactorial School túlekteri tálim berip, IT ónimderin halyqaralyq naryqqa shyǵarý jáne aqshalai paida ákelý joldaryn tanystyrady»,-dedi Aidar Nuǵymanov.
Bilim jáne ǵylym ministri Aibat Iliiasovtyń aitýynsha, IT bilim berý jobalary memlekettiń damýynda mańyzdy strategiialyq jáne áleýmettik ról atqarady.
«Prezident Toqaev aityp ótkendei, bizdiń elimizge jas, bilimdi jáne yntaly kadrlar qajet jáne eldiń barlyq aimaǵynan kelgen 200 daryndy jasqa arnalǵan jazǵy baǵdarlamalaý mektebi 10 000 joǵary bilikti IT- mamandy ázirleý jolyndaǵy taǵy bir qadam», - dedi mekteptiń ashylý saltanatynda sóz alǵan vitse ministr.
Sharanyń bas demeýshisi «Shevron» kompaniiasynyń ókili Leila Aitmuhanova JOO-da mundai paidaly is-sharalardy kóbirek ótkizý qajettigin, jastardyń talpynysy men qyzyǵýshylyǵynyń zor ekendigin atap ótti.
El Prezidenti Qasym-Jomart Toqaev joldaýynda «Qazirgi zamanda básekelestiktegi basym baǵyttardyń biri tsifrlandyrý. Qazaqstan úshin de zamanaýi tsifrlyq tehonologiiany engizý men qoldaný mańyzdy. Osy oraida biz sheteldik seriktesterimizben belsendi jumys isteýimiz kerek. Sonyń ishinde otandyq IT sektordy ilgeriletýdi de umytpaǵan jón.
Tsifrlandyrý týraly ulttyq joba aiasynda kem degende 100 myń joǵary sanatty IT maman ázirleýimiz kerek. Eksporttyq jáne tsifrlyq sala boiynsha taýar qyzmeti 2025 jylǵa qarai kem degende 500 mln AQSh dollaryna jetýi tiis. Memlekettik sektordy tsifrlandyrýda osy jáne ózge de mindetterdi qaita qarastyrý qajet»-dep atap ótken bolatyn.
Jazǵy jobany uiymdastyrýshylardyń maqsaty da IT salasynda úzdik mamandardy ázirleý. Joba nátijesinde qatysýshylar 150-den astam qazaqstandyq ónim ázirleidi jáne eń úzdikteri investorlar men kásipkerlerge startap prezentatsiia retinde usynylatyn bolady.
