الدىمەن، وبلىستىق ءماسليحاتتىڭ حاتشىسى نۋري تۇمىشيەۆ وبلىستىق ءماسليحاتتىڭ اتقارعان جۇمىسى تۋرالى ەسەپ بەردى.
ماڭعىستاۋ وبلىستىق ءماسليحاتتىڭ تۇراقتى كوميسسيا ءتوراعاسى مارات سەباسوۆ قوعامداعى الەۋمەتتىك ماسەلەلەر مەن قۇقىقتىق ءتارتىپتى قوزعاپ، ءسوز سويلەدى. كوميسسيا ءتوراعاسىن تىڭداعان ءماسليحات دەپۋتاتتارى سايلاۋشىلارىنان كەلىپ تۇسەتىن سۇراقتاردى باقىلاۋعا الۋدى، سەسسيالار مەن تۇراقتى كوميسسيا وتىرىستارىندا قارالاتىن ماسەلەلەردى دايىنداۋعا بەلسەندى قاتىسۋدى ۇسىندى.
سونىمەن قاتار، وبلىس اكىمىنىڭ ورىنباسارى المۇحاممەد قۇتتىمۇرات ۇلى وبلىستىق بيۋدجەتكە ەنگىزىلگەن وزگەرىستەر تۋرالى بايانداما جاسادى.
ونىڭ ايتۋىنشا بيۋدجەتتى ناقتىلاۋ 2021 جىلى قالىپتاسقان كرەديتورلىق بەرەشەكتى وتەۋگە، «AMANAT» پارتياسىنىڭ سايلاۋالدى باعدارلاماسىنىڭ جول كارتاسى مەن وبلىستىڭ الەۋمەتتىك-ەكونوميكالىق دامۋىنىڭ كەشەندى جوسپارىندا كوزدەلگەن ءىس-شارالاردى، سونداي-اق جەرگىلىكتى بيۋدجەتتىڭ جەدەل ءىس-شارالارىن ىسكە اسىرۋعا باعىتتالعان.
– 2021 جىلى جەرگىلىكتى بيۋدجەت كىرىسىنىڭ جەتىسپەۋشىلىگىنەن شىعىنداردى وتەۋ ماسەلەسى تۋىندادى. وسىلايشا، 2021 جىلدىڭ قورىتىندىسى بويىنشا كرەديتورلىق بەرەشەك پايدا بولدى. كرەديتورلىق بەرەشەكتىڭ جالپى كولەمى 6،1 ملرد تەڭگەنى قۇرادى، – دەدى المۇحاممەد قۇتتىمۇرات ۇلى.
بيۋدجەتتى ناقتىلاۋدىڭ ەكىنشى باعىتى پارتيانىڭ سايلاۋالدى باعدارلاماسىنىڭ جول كارتاسى جانە وبلىستىڭ كەشەندى جوسپارى شەڭبەرىندە ىسكە اساتىن شارالارعا ارنالعان. اتالعان جۇمىستاردى قارجىلاندىرۋ ءۇشىن 1،1 ملرد تەڭگە ءبولۋ ۇسىنىلادى. قاراجات پرەزيدەنتتىڭ تاپسىرماسىنا سايكەس 12 اۋىلدىق ەلدى مەكەندى اۋىز سۋمەن قامتاماسىز ەتۋگە جۇمسالاتىن بولادى. 7 اۋىلدا سۋ تۇشىتۋ قوندىرعىلارىن ورناتۋعا جانە سورعىلار ساتىپ الۋعا 225 ملن تەڭگە قاجەت. بۇل جوبالار اقشۇقىر، اقمايا، بوزداق، 15 ستانسيا، قياقتى، تيگەن جانە تاسمۇرىن اۋىلدارىندا ىسكە اسىرىلاتىن بولادى.
كەلەسى ماڭىزدى باعىت – قۇدىقتاردى قالپىنا كەلتىرۋ جانە قايتا قۇرۋ. وسى ماقساتتا جىڭعىلدى، شايىر، كوگەز-اقمىش، شەبىر جانە وندى اۋىلدارىنداعى قۇدىقتاردى قايتا جاڭارتۋعا 39 ملن تەڭگە ءبولىندى.
ءۇشىنشى باعىت بويىنشا جاڭاوزەن قالاسىن دامىتۋعا، كوممۋنالدىق تۇرعىن ءۇي شىعىندارى مەن قوعامدىق قاۋىپسىزدىككە قاراجات ءبولۋ جوسپارلانۋدا.
جيىن سوڭىندا نۇرلان نوعايەۆ جينالعانداردى جاڭا قازاقستاندى قۇرۋدا اۋىزبىرشىلىك پەن ۇيىمشىلدىققا شاقىردى.
– پرەزيدەنت ازاماتتىق قوعامدى دامىتۋ جانە مەملەكەتتىك ورگاندار قىزمەتىنىڭ اشىقتىعىن قامتاماسىز ەتۋ بويىنشا تاپسىرما جۇكتەدى. ءبىزدىڭ باستى كۇشىمىز ادىلەتتىلىك پەن اشىقتىقتا. وسى ەكى فاكتور بولعان جاعدايدا عانا ءبىز قولدا بار رەسۋرستاردى دۇرىس پايدالانىپ، جوسپارلارىمىزدى ءتيىمدى ىسكە اسىرا الامىز، – دەپ نۇرلان نوعايەۆ ءوز ءسوزىن قورىتىندىلادى.
