ماڭعىستاۋ وبلىسىندا قىزمەت كولىكتەرىن جوندەۋگە 136 ميلليون بولىنبەك، – دەپ حابارلايدى Dalanews.kz.
"كتك" تەلەارناسى مالىمەتىنشە، ماڭعىستاۋ وبلىسىنىڭ اكىمدىگى 23 قىزمەت كولىگىن كۇردەلى جوندەۋدەن وتكىزۋ ءۇشىن 136 ميلليون تەڭگە ءبولۋدى جوسپارلاپ وتىر. شامامەن ءار كولىككە 6 ميلليون تەڭگەگە جۋىق قارجى قاراستىرىلعان.
4 ساۋىردە جاريالانعان تەندەرگە سايكەس اكىمدىككە قاراستى باسقارمانىڭ بالانسىنداعى 23 كولىك كۇردەلى جوندەۋدەن وتكىزىلەدى. ماشينالاردىڭ ماركاسى دا اناۋ-مىناۋ ەمەس: كىلەڭ پرەميۋم ساناتتاعى تەمىر تۇلپارلار سەكىلدى.
"جالپى وبلىس اكىمدىگىنىڭ مەنشىگىندە 37 كولىك بار، سونىڭ جارتىسىنان كوبىنە كۇردەلى جوندەۋ قاجەت"، - دەيدى شەنەۋنىكتەر.
"كولىكتەر ەسكىرگەن. 2005، 2010 جىلعى كولىكتەر بار. كوبىنە قوزعالتقىشتارى، اۆتومات قورابىنا كۇردەلى جوندەۋ قاجەت. كۋزوۆ جۇمىستارى، شاناقتى سىرلاۋ سياقتى. كۇردەلى جۇمىس بولعاندىقتان قىمباتقا شىعىپ تۇر"، - دەيدى ماڭعىستاۋ وبلىسى اكىمدىگى، ءىس باسقارماسى باسشىسىنىڭ ورىنباسارى ايبەك دۇيسەنعالييەۆ.
