تيمۋر قۇلىبايەۆتىڭ ورنىنا ۇلتتىق وليمپيادا كوميتەتىنىڭ پرەزيدەنتى قىزمەتىنە گەنناديي گولوۆكين كەلگەننەن كەيىن كوميسسيا قۇرامىندا ءبىراز وزگەرىس بولدى. بۇل وزگەرىستەر بۇعان دەيىن دە بولجانعان ەدى. قۇرامدا ءالى دە ەسكى قازاقستاننىڭ جارقىن وكىلدەرى مەن وليگارحتار بار، - دەپ حابارلايدى Dalanews.kz.
جاڭا قۇرامدا ەكس-شەنەۋنىكتەر اسقار مامين، دانيال احمەتوۆ، وعان قوسا وليگارح بولات وتەمۇراتوۆ تا ءجۇر.
اسقار مامين قىسقى سپورت تۇرلەرى بويىنشا ۆيسە-پرەزيدەنت، "شايبالى حوككەي فەدەراسياسى" رقۇ پرەزيدەنتى قىزمەتىنە كەلدى. ال ۇلتتىق فەدەراسيا وكىلدەرى قاتارىندا دانيال احمەتوۆ پەن بولات وتەمۇراتوۆتىڭ ەسىمى بار. دالىرەك ايتساق، احمەتوۆ "قازاقستان رەسپۋبليكاسى جەڭىل اتلەتيكا فەدەراسياسى" رقۇ پرەزيدەنتى بولسا، وتەمۇراتوۆ "تەننيس فەدەراسياسى" رقۇ پرەزيدەنتى بولىپ وتىر.
بۇعان دەيىن دە مامين مەن احمەتوۆتىڭ كانديداتۋراسى ۇسىنىلعان بولاتىن.
"ۇلتتىق وليمپيادا كوميتەتىنىڭ قىسقى سپورت تۇرلەرى جونىنەن ۆيسە-پرەزيدەنتى قىزمەتىنە بۇرىنعى پرەمەر-مينيستر اسقار ءماميننىڭ كانديداتۋراسى ۇسىنىلدى"، - دەپ جازىلعان ەدى قۇجاتتا.
الەۋمەتتىك جەلىلەردە وسىعان دەيىن ءماميننىڭ تۇركيا ەلىندە الاڭسىز جۇرگەن ۆيدەوسى جىلت ەتكەن بولاتىن. ال وعان دەيىن فۋتبول فەدەراسياسىنىڭ ەكس-پرەزيدەنتى ادىلبەك جاقسىبەكوۆ پەن اسقار مامين ىستامبۇلدا وتكەن چەمپيوندار ليگاسىندا جۇرگەن جەرىنەن كوزگە ءتۇستى. ەكس-شەندى مامين 2022 جىلى لاۋازىمىنان ءتۇسىپ قالدى. ونىڭ ورنىنا ۇكىمەتتى باسقارۋعا ءاليحان سمايىلوۆ كەلگەن بولاتىن.
ال احمەتوۆ جۋىردا عانا استانادا جەڭىل اتلەتيكادان ءامين تۇياقوۆ جۇلدەسىنە ارنالعان Astana Indoor Meet حالىقارالىق ءتۋرنيرى اياسىندا كوزگە ءتۇسىپ قالعان ەدى. دەرەكتەرگە سۇيەنسەك، ەكس-شەنەۋنىك جەڭىل اتلەتيكا فەدەراسياسىنىڭ پرەزيدەنتى رەتىندە بارعان. شىعىس قازاقستاندى تاپجىلماي 9 جىل باسقارعان ەكس-اكىم وسىلاي سپورتتى تىزگىندەۋگە ويىسىپتى.
قوعامدا ۇلتتىق وليمپيادا كوميتەتىنىڭ باسشىلىق قۇرامىنا قاتىستى قىزۋ داۋ جۇرگەن ەدى. دەپۋتاتتار دا بۇل ماسەلەنى بىرنەشە مارتە كوتەردى. ماسەلەن، باپي قۇلىبايەۆتى اشىق سىناپ تاستادى.
"ونىڭ ويى ەلدىڭ مۇنايىن ساتىپ، قالتاسىن تولتىرۋ. سپورتتى قايتسىن؟! ...پاريج وليمپياداسى قارساڭىندا مۇنداي جاعدايعا مۇلدەم جول بەرىلمەۋى ءتيىس! ۇلتتىق وليمپيادا كوميتەتىنە تۇبەگەيلى وزگەرىستەر كەرەك"، - دەگەن ەدى ول.
