ءساۋىر ايىنىڭ قورىتىندىسى بويىنشا تەڭگە باعامى 1 اقش دوللارى ءۇشىن 512،48 تەڭگەگە دەيىن، ياعني 1،6%-عا السىرەدى. قازاقستان قور بيرجاسىنداعى ساۋدا-ساتتىقتىڭ ورتاشا ءبىر كۇندىك كولەمى ءبىر ايدا 243 ملن اقش دوللارىنان 246 ملن اقش دوللارىنا دەيىن ۇلعايدى. ساۋدا-ساتتىقتىڭ جالپى كولەمى 5،4 ملرد اقش دوللارى بولدى، دەپ حابارلايدى Dalanews.kz ۇلتتىق بانكتىڭ باسپا ءسوز قىزمەتىنە سىلتەمە جاساپ.

ساۋىردە ۇلتتىق قوردان 968 ملن اقش دوللارىنا ۆاليۋتا ساتىلدى. بۇل رەسپۋبليكالىق بيۋدجەتكە ترانسفەرت ءبولۋدى قامتاماسىز ەتۋگە مۇمكىندىك بەردى. ۇلتتىق قوردان ساتۋ ۇلەسى جالپى ساۋدا-ساتتىق كولەمىنىڭ 18%-ىن نەمەسە كۇنىنە شامامەن 44 ملن اقش دوللارىن قۇرادى. 

"رەسپۋبليكالىق بيۋدجەتكە ترانسفەرت بولۋگە ارنالعان ۇكىمەتتىڭ الدىن الا بولجامدى وتىنىمدەرى بويىنشا مامىردا ۇلتتىق بانك ۇلتتىق قوردان 950 ملن اقش دوللارىنان 1050 ملن اقش دوللارىنا دەيىنگى مولشەردە ۆاليۋتا ساتىلادى دەپ بولجايدى. ساۋىردە "شاعىلىستىرۋ" وپەراسياسى اياسىندا 213 ملرد تەڭگە الىندى. مامىر ىشىندە وسى ماقساتتا 213 ملرد تەڭگەگە بالامالى مولشەردە ۆاليۋتا ساتىلادى دەپ كۇتىلۋدە"، دەپ ناقتىلايدى باس رەتتەۋشى ورگان.

ۇلتتىق قور قاراجاتىمەن وپەراسيالار جۇرگىزۋ كەزىندە، سونداي-اق "شاعىلىستىرۋ" تەتىگىن ىسكە اسىرۋ كەزىندە ۇلتتىق بانك نارىقتىق بەيتاراپ قاعيداتىن ساقتايدى. بۇل شەتەل ۆاليۋتاسىن تۇراقتى جانە بىركەلكى ساتۋدى بىلدىرەدى.

ۇلتتىق بانك ساۋىردە ۆاليۋتالىق ينتەرۆەنسيا جۇرگىزگەن جوق.

وتكەن ايدىڭ قورىتىندىسى بويىنشا، ۆاليۋتالىق ءتۇسىمنىڭ ءبىر بولىگىن مىندەتتى ساتۋ نورماسى اياسىندا كۆازيمەملەكەتتىك سەكتور سۋبەكتىلەرىنىڭ ۆاليۋتالىق ءتۇسىمدى ساتۋ كولەمى شامامەن 308 ملن اقش دوللارىن قۇرادى. كۆازيمەملەكەتتىك سەكتور كومپانيالارى ۆاليۋتا نارىعىنداعى ساتۋ پروسەسىن ەكىنشى دەڭگەيلى بانكتەر ارقىلى ءوز بەتىنشە جالعاستىرىپ كەلەدى.

"بجزق زەينەتاقى اكتيۆتەرىنىڭ ۆاليۋتالىق ۇلەسىن 40% دەڭگەيىندە ۇستاپ تۇرۋ ماقساتىندا ۇلتتىق بانك ساۋىردە بيرجاداعى ساۋدا-ساتتىقتا شەتەل ۆاليۋتاسىن ساتىپ الدى. ونىڭ جالپى سوماسى 250 ملن اقش دوللارىن نەمەسە جالپى ساۋدا-ساتتىق كولەمىنىڭ شامامەن 5%-ىن قۇرادى. ۇلتتىق بانك بجزق زەينەتاقى اكتيۆتەرىن سەنىمگەرلىكپەن باسقارۋشى رەتىندە ۇزاقمەرزىمدى كەزەڭدە ناقتى كىرىس الۋدى جانە ونىڭ ساقتالۋىن قامتاماسىز ەتۋدى باستى نازاردا ۇستايدى. وسىعان بايلانىستى ۆاليۋتا نارىقتىق كونيۋنكتۋراعا بايلانىستى ساتىپ الىنادى. بۇل رەتتە، وسى ماقساتتا مامىردا ۆاليۋتانى ساتىپ الۋ كولەمى 250 ملن اقش دوللارىنان اسپايدى"، دەلىنگەن رەسمي حابارلامادا.

ايتا كەتسەك،بۇعان دەيىن ەل ەكونوميكاسىن "قىزىپ كەتۋدەن" قورعاۋ ءۇشىن العاش رەت بانكتەر كاپيتالىنىڭ جەتكىلىكتىلىگىنە بۋفەرلەر قولدانىلعانىن جازعانبىز.