وتىرىستا جەر قويناۋى جانە جەر قويناۋىن پايدالانۋ تۋرالى كودەكسىنىڭ جوباسىن ىلەسپە تۇزەتۋلەرىمەن ينۆەستيسيالار جانە دامۋ ءمينيسترى جەڭىس قاسىمبەك باياندادى.
ءمينيستردىڭ مالىمدەۋىنشە، كودەكس جوباسى – جەر قويناۋىن پايدالانۋشىلاردىڭ جۇمىسىندا كەزدەسەتىن كەدەرگىلەردى جويىپ، سالانىڭ قۇقىقتىق بازاسىن جەتىلدىرۋگە، حالىقارالىق ستاندارتتارعا وتۋگە جانە ينۆەستيسيالىق كليماتتى جاقسارتىپ، سالاعا تىكەلەي شەتەلدىك ينۆەستيسيالار تارتۋعا باعىتتالعان. بۇگىنگى تاڭدا 104 ەلدىڭ ىشىندە قازاقستان گەولوگيا سالاسىن مەملەكەتتىك رەتتەۋ بويىنشا تەك 74ء-شى ورىندا تۇر. ال جەر قويناۋىنىڭ گەولوگيالىق تارتىمدىلىعى جاعىنان 45ء-شى ورىندا. بۇل رەفورما الەمدە بولىپ جاتقان داعدارىس پەن ونىڭ سالدارىنان ينۆەستور تارتۋعا بايلانىستى باسەكەلەستىكتىڭ ارتۋىنان تۋىنداپ وتىر.
ۇلت جوسپارى باعدارلاماسىنىڭ قادامدارىن ىسكە اسىرۋ ماقساتىندا ازىرلەنگەن وسى كودەكس جوباسى بويىنشا دەپۋتاتتاردان، تۇراقتى كوميتەتتەردەن جانە ءماجىلىستىڭ زاڭناما بولىمىنەن كەلىپ تۇسكەن 600-دەن استام ەسكەرتۋلەر مەن ۇسىنىستار قارالىپ، تالقىلانعان.
جەر قويناۋىن ويداعىداي يگەرۋ تۋرالى بۇعان دەيىن جوعارى بيلىكتە بىرنەشە مارتە ءسوز بولىپ، زاڭدى كەمەلدەندىرۋ تۋرالى ۇسىنىس-پىكىرلەر ايتىلعان بولاتىن. جاڭا زاڭ جوباسى ەلىمىز جەرىن ءتيىمدى پايدالانۋدى، ينۆەستور تارتىپ، جۇمىس ورىندارىن اشۋدى، جەر قويناۋىنان الىناتىن ءتۇرلى كەندەر مەن شيكىزاتتاردى وڭدەۋدى قولعا الۋعا مۇمكىندىك تۋعىزادى دەپ وتىر.
