پارلامەنت پالاتالارىنىڭ بىرلەسكەن وتىرىسىندا ءماجىلىس ءتوراعاسى ەرلان قوشانوۆ ۇكىمەتپەن جۇمىس بارىسىندا پروبلەمالار بارىن ايتتى، دەپ حابارلايدى Dalanews.kz.
"كونستيتۋسيا بويىنشا دەپۋتاتتارمەن قاتار ۇكىمەتتىڭ دە زاڭعا باستاماشىلىق ەتۋگە قۇقىعى بار. الايدا زاڭ جوباسىن وزدەرى ازىرلەۋ ورنىنا، مينيسترلىكتەر ماسەلەنى دەپۋتاتتاردىڭ تۇزەتۋلەرى ارقىلى نەمەسە پارلامەنتكە حات جازۋ ارقىلى شەشۋدى ادەتكە اينالدىرا باستادى. ۇكىمەت رەگلامەنتى بويىنشا تۇزەتۋلەردى زاڭ جوباسىن ماجىلىستە تالقىلاۋ كەزىندە ەنگىزۋ تۋرالى نورما بار. ءبىراق مينيسترلىكتەر تاراپىنان ول نورماعا تىم ءجيى جۇگىنۋ بايقالىپ وتىر. كەيدە ونداي تۇزەتۋلەر ءتىپتى جالپى وتىرىس وتەتىن كۇنى كەلىپ ءتۇسىپ جاتادى. وسى سەسسيادا مۇنداي تارماق بويىنشا ۇكىمەتتەن كەلىپ تۇسكەن حاتتار سانى ەكى ەسە ارتتى"، - دەيدى ول.
ايتا كەتەيىك، 30 ماۋسىمدا پارلامەنت پالاتالارىنىڭ بيىلعى ساياسي ماۋسىمداعى سوڭعى بىرلەسكەن وتىرىسى ءوتتى. ءماجىلىس سپيكەرى ەرلان قوشانوۆ اتقارىلعان جۇمىستاردى قورىتىندىلادى.
"بۇگىن سەگىزىنشى سايلانعان قازاقستان رەسپۋبليكاسى پارلامەنتىنىڭ ءۇشىنشى سەسسياسىنىڭ جۇمىسىن اياقتاعالى وتىرمىز. ءبىز ءوز وكىلەتتىگىمىزدىڭ تۋرا بەل ورتاسىنا كەلدىك. ءىس جۇزىندە بۇل – بىرلەسە اتقارىپ جاتقان جۇمىسىمىزدىڭ ماڭىزدى كەزەڭى، مەجەلى بەلەسى"، - دەدى ول.
