قازاقستان پارلامەنتٸ مەجٸلٸسٸنٸڭ تٶراعاسى ەرلان قوشانوۆ 11 قاراشادا پرەزيدەنتٸككە كانديداتتار اراسىندا ٶتەتٸن دەباتقا قازٸرگٸ پرەزيدەنت ەرٸ ٷمٸتكەر قاسىم-جومارت توقاەۆتىڭ نەگە قاتىسپايتىنىن تٷسٸندٸردٸ.
– بٸرٸنشٸدەن, قازٸر پرەزيدەنت ٶز ٶكٸلەتٸن جالعاستىرىپ جاتىر. جۇمىس كەستەسٸ ٶتە تىعىز. پرەزيدەنت بولۋ مەملەكەتتٸڭ بٷكٸل تاعدىرىنا, ٸشكٸ جەنە سىرتقى ساياساتىنا جاۋاپ بەرۋ. ەكٸنشٸدەن, دەباتقا شتاب اتىنان باسقا ٶكٸلدٸڭ قاتىسۋى ەشبٸر سايلاۋ زاڭىنا قايشى ەمەس, – دەدٸ ازاتتىق تٸلشٸسٸنٸڭ سۇراعىنا جاۋاپ بەرگەن مەجٸلٸس سپيكەرٸ.
قازاقستاندا پرەزيدەنتتٸككە كانديداتتار اراسىندا ساياسي دەبات 11 قاراشادا ٶتپەكشٸ. ول سول كٷنٸ "حابار" ارناسىنان كٶرسەتٸلەدٸ.
80 مينۋتتىق بٸر دەبات ٷشٸن "حابار" اگەنتتٸگٸنە مەملەكەتتەن 63 ميلليون تەڭگە بٶلٸنەتٸنٸ وسىعان دەيٸن حابارلانعان.
وسك ٶكٸلدەرٸنٸڭ ايتۋىنشا, دەباتقا قازاقستان پرەزيدەنتتٸگٸنە كانديدات قاسىم-جومارت توقاەۆتان ٶزگە ٷمٸتكەرلەردٸڭ بەرٸ: قاراقات ەبدەن, نۇرلان ەۋەسباەۆ, جيگۋلي دايراباەۆ, مەيرام قاجىكەن, سالتانات تۇرسىنبەكوۆالار قاتىسادى. ولارمەن دەباتتا توقاەۆتىڭ ورنىنا مەجٸلٸس سپيكەرٸ ەرلان قوشانوۆ سٶز جارىستىرادى.
"حابار" اگەنتتٸگٸنٸڭ ٶكٸلٸ دەۋلەتحان جيەنقۇلوۆتىڭ سٶزٸنشە, دەباتقا قاتىسۋشىلارعا تٸكەلەي ەفيردە سۇراق قويىلمايدى.
پرەزيدەنتٸككە كانديدات قاسىم-جومارت توقاەۆ 2019 جىلى كەزەكتەن تىس ٶتكەن سايلاۋ كەزٸندە دە تٸكەلەي ەفير دەباتىنا قاتىسپاعان. قازاقستاننىڭ بۇرىنعى پرەزيدەنتٸ نۇرسۇلتان نازارباەۆ تا ٶزٸ بيلٸكتە وتىرعاندا ەلدە ٶتكەن دەباتتارعا ەشقاشان قاتىسقان ەمەس.
قازاقستان ازاماتتارى بيىل 20 قاراشادا ەل پرەزيدەنتٸن سايلاماق. بۇعان دەيٸنگٸ سايلاۋلار سيياقتى بۇل دا كەزەكتەن تىس ٶتكەلٸ وتىر.
