ءماجىلىس دەپۋتاتتارى بۇقارالىق اقپارات قۇرالدارىندا، الەۋمەتتىك جەلىلەردە، جارنامادا جانە وزگە دە اشىق الاڭداردا لگبت ناسيحاتىنا تىيىم سالۋدى كوزدەيتىن زاڭ جوباسىن ەكىنشى وقىلىمدا قابىلدادى. قۇجات بالالاردى "زياندى اقپاراتتان قورعاۋ" ماقساتىندا ازىرلەنگەن جانە ەندى سەناتتىڭ قاراۋىنا جىبەرىلدى، دەپ حابارلايدى Dalanews.kz.

Bes.media مالىمەتىنشە، تۇزەتۋلەرگە سايكەس، پەدوفيليا مەن ءداستۇرلى ەمەس جىنىستىق قاتىناس تاقىرىبىنداعى ماتەريالداردى تاراتۋعا شەكتەۋ قويىلادى. زاڭدى بۇزعاندارعا اكىمشىلىك جاۋاپكەرشىلىك قاراستىرىلعان - 40 ايلىق ەسەپتىك كورسەتكىشكە دەيىن ايىپپۇل نەمەسە 10 تاۋلىككە دەيىن قاماۋ.

پارلامەنتارييلەردىڭ ايتۋىنشا، بۇل باستاما بالالاردى "مورالدىق قۇندىلىقتارعا كەرى اسەر ەتەتىن كونتەنتتەن قورعاۋعا" باعىتتالعان جانە لگبت ناسيحاتىنا قارسى پەتيسيانىڭ جالعاسى بولىپ تابىلادى.

الايدا قۇقىق قورعاۋشىلار بۇل زاڭدى ديسكريميناسيالىق ءارى حالىقارالىق مىندەتتەمەلەرگە قايشى دەپ سانايدى. ولاردىڭ پىكىرىنشە، قۇجات ازاماتتاردىڭ تەڭدىك قاعيداتىن بۇزىپ، قۋدالاۋ مەن سەنزۋرا ءقاۋپىن ارتتىرادى.

ءبىلىم مينيسترلىگىنىڭ ۇستانىمى

مينيسترلىك زاڭ جوباسىن قولداعان. ۆەدومستۆو وكىلدەرى لگبت تاقىرىبىنداعى ناسيحاتتى كيبەربۋللينگپەن تەڭەستىرىپ، مۇنداي كونتەنت بالالاردىڭ پسيحيكاسىنا تەرىس اسەر ەتۋى مۇمكىن ەكەنىن اتاپ ءوتتى.

ايتا كەتەيىك، بۇل تاقىرىپ 2024 جىلدان بەرى تالقىلانىپ كەلەدى. لگبت ناسيحاتىنا قارسى پەتيسيادان كەيىن ماسەلە بىرنەشە رەت ءماجىلىس وتىرىستارىندا كوتەرىلىپ، قوعامدىق جانە ءدىني پىكىرتالاستارعا ۇلاسقان.

ساراپشىلاردىڭ ايتۋىنشا، بۇل زاڭ قابىلدانسا، لگبت قاۋىمداستىعىنا قارسى ستيگماتيزاسيا مەن تەڭسىزدىك كۇشەيۋى مۇمكىن.