بەلارۋس مەملەكەتتىك تەلەارناسى جەكسەنبى كۇنى تەرگەۋ اباقتىسىنان الەكساندر لۋكاشەنكومەن كەزدەسۋدەن كەيىن ەكى وپپوزيسيالىق ليدەردىڭ بوساپ شىققانىن مالىمدەدى.

ولار – پرەزيدەنتتىككە ۇمىتكەر بولعان ۆيكتور باباريكو كامپانياسىنىڭ سەنىمدى وكىلى يۋريي ۆوسكرەسەنسكيي مەن PandaDoc كومپانياسىنىڭ مينسك كەڭسەسىنىڭ ديرەكتورى دميتريي رابسيەۆيچ. ولاردى ءۇيقاماققا اۋىستىرعان.

ولاردىڭ بوساپ شىققانىن تۋىستارى راستادى.

لۋكاشەنكو سەنبى كۇنى تەرگەۋ اباقتىسىنا بارىپ، قاماۋدا جاتقان بىرنەشە وپپوزيسيالىق ساياساتكەرلەرمەن كەزدەسكەن. وندا نە ايتىلعانى ناقتى بەلگىسىز.

ءبىراق سوڭعى كەزدە لۋكاشەنكو ءجيى كوتەرىپ جۇرگەن كونستيتۋسياعا وزگەرىستەر جايلى ايتىلۋى مۇمكىن. كەزدەسۋگە 12 ادام قاتىسقان. اراسىندا پرەزيدەنتتىكتەن ۇمىتكەر بولعان وپپوزيسيا ليدەرى ۆيكتور باباريكو دا بولعان. ول سايلاۋعا دەيىن قاماۋعا الىنعان.

وتكەن جەكسەنبىدە مينسكىدە لۋكاشەنكونىڭ باسقارۋىنا قارسى كەزەكتى نارازىلىق اكسياسى ءوتتى. بۇل جولى ميليسيا مەن ومون وكىلدەرى دەمونسترانتتارعا قارسى قاتال ارەكەت ەتكەن. جارالانعاندار بار دەلىنەدى. كەمىندە 200 ادام ۇستالعان.