قازاقستان تۇركيادان تالعات ارداندى ەكستراديسيالاۋدى سۇرادى، – دەپ حابارلايدى Dalanews.kz.

Tengrinews.kz مالىمەتىنشە، باس پروكۋراتۋرا تۇركيادا ۇستالعان "استانا LRT" بۇرىنعى باسشىسى تالعات ارداندى ەكستراديسيالاۋ ماسەلەسىنە قاتىستى پىكىر بىلدىرگەن.

Tengrinews.kz ساۋالىنا جاۋاپ بەرگەن ۆەدومستۆو بۇعان دەيىن تالعات ارداننىڭ قازاقستاننىڭ سىبايلاس جەمقورلىققا قارسى قىزمەتى تاراپىنان قىلمىستىق كودەكستىڭ "سەنىپ تاپسىرىلعان بوتەن مۇلىكتى يەلەنىپ الۋ نەمەسە ىسىراپ ەتۋ" جانە "قىزمەتتىك وكىلەتتىكتەردى تەرىس پايدالانۋ" باپتارىندا كوزدەلگەن قىلمىستاردى جاساعانى ءۇشىن ىزدەۋدە بولعانىن ناقتىلادى. وعان قاتىستى قاماۋدا ۇستاۋ بۇلتارتپاۋ شاراسى تاڭدالعان. تالعات اردان بۇعان دەيىن حالىقارالىق ىزدەۋدە بولدى.

10 مامىردا تالعات اردان تۇركيا رەسپۋبليكاسى اۋماعىندا ۇستالىپ، انتاليادا قامالعانى تۋرالى اقپارات الىنعان.

"ءقازىر قازاقستان رەسپۋبليكاسىنىڭ باس پروكۋراتۋراسى ارقىلى ت.ن. ارداندى ەكستراديسيالاۋ ءۇشىن بارلىق قاجەت قۇجات تۇركيا رەسپۋبليكاسىنىڭ ۋاكىلەتتى ورگاندارىنا جولداندى. ونى ەكستراديسيالاۋ ماسەلەسى تۇركيا تاراپىنىڭ قاراۋىندا"، – دەپ جازىلعان قازاقستان باس پروكۋراتۋراسىنىڭ Tengrinews.kz ساۋالىنا بەرگەن جاۋابىندا.

بۇعان دەيىن باس پروكۋروردىڭ ورىنباسارى اسەت شىندالييەۆ استاناداعى LRT قۇرىلىسى كەزىندە قارجى جىمقىردى دەگەن ايىپپەن سوتتالعانداردى قۇقىق قورعاۋ ورگاندارى نەگە قازاقستانعا قايتارا المايتىنىن تۇسىندىرۋگە تىرىستى.

سونىمەن قاتار، شەنەۋنىكتىڭ مالىمەتىنشە، ينتەرپول استانا اكىمىنىڭ بۇرىنعى ورىنباسارى قانات سۇلتانبەكوۆتى ىزدەستىرىپ جاتىر.