تۋريزم جانە سپورت ءمينيسترى ەربول مىرزابوسىنوۆ لەگيونەرلەرگە قاتىستى سۇراققا جاۋاپ بەردى، - دەپ حابارلايدى Dalanews.kz.
شەنەۋنىك ەلدە ەندى لەگيونەرلەردى تەك دەمەۋشىلەر قارجىلاندىراتىنىن ايتتى.
"بۇگىنگى كۇنى جاڭا زاڭناما اياسىندا لەگيونەرلەرگە مەملەكەتتىك جانە كۆازيمەملەكەتتىك باعىتتا قاراجات بولىنبەيدى. ۇلتتىق قۇرامادا لەگيونەرلەر جوق. كوبىنە كلۋبتىق جۇيەلىك ماسەلەلەر. فۋتبول، حوككەي كلۋبتارىندا لەگيونەرلەر بار. ولارعا زاڭعا قول قويىلعالى بەرى قاراجات بولىنبەيدى. تەك كاسىپتىك، دەمەۋشىلەر ەسەبىنەن قارجى بولىنەدى"، - دەدى ول Ulysmedia-عا.
ءمينيستردىڭ سوزىنشە، بۇل قارجى باسقا باعىتتارعا جۇمسالادى.
"كوپ كلۋبتا دەمەۋشىلىك قاراجاتقا لەگيونەرلەر جۇمىس ىستەيدى. بۇگىنگى تاڭدا الەمدىك، رەسپۋبليكالىق ارەنادا بولسىن، باسەكەلەستىك ورناتقىسى كەلسە، تەك دەمەۋشىلەر ەسەبىنەن قارجىلاندىرىلادى"، - دەپ جاۋاپ بەردى مينيستر Ulysmedia-عا.
ەسكە سالايىق، جۋىردا مەملەكەت باسشىسى "قازاقستان رەسپۋبليكاسىنىڭ كەيبىر زاڭنامالىق اكتىلەرىنە دەنە شىنىقتىرۋ جانە سپورت، سونداي-اق، ارتىق زاڭنامالىق رەگلامەنتتەۋدى بولعىزباۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" قازاقستان رەسپۋبليكاسىنىڭ زاڭىنا قول قويدى. بۇل زاڭعا سايكەس ەندى شەتەلدىك لەگيونەرلەردى حالىق اسىرامايدى.
"شەتەلدىك لەگيونەرلەردى بيۋدجەتتەن جانە كۆازيمەملەكەتتىك سەكتور سۋبەكتىلەرىنىڭ قاراجاتى ەسەبىنەن قارجىلاندىرۋعا تىيىم سالىنادى"، - دەپ جازىلعان حابارلامادا.
بۇدان بىلاي بيۋدجەت قاراجاتى تەك ءتورت باعىتقا:
- جوعارى جەتىستىكتەر سپورتىنا، ونىڭ ىشىندە سپورتتىڭ باسىم تۇرلەرىنە،
- مەملەكەتتىك دەنە شىنىقتىرۋ-سپورت ۇيىمدارىنىڭ قىزمەتىنە،
- بۇقارالىق سپورتقا،
- سپورتتىق ينفراقۇرىلىمدى دامىتۋعا جۇمسالادى.
