بريۋسسەلدەگى تەراكتىدەن كەيىن تۇركيانىڭ سىرتقى ىستەر مينيسترلىگى: «لاڭكەستەر وركەنيەتتى الەمگە جانە بارشاعا ورتاق قۇندىلىقتارعا شابۋىل جاسادى»، – دەدى.
بۇل مۇلدە جاڭساق مالىمدەمە!
يسلام ەلدەرىندەگى بارلىق تەرروريستىك ۇيىمداردى «جارىققا شىعارعان» ءبىز «وركەنيەتتى الەم» رەتىندە تانيتىن باتىستىڭ ارنايى قىزمەت قۇرىلىمدارى بولاتىن.
تەررور دەگەنىمىز نە؟ انىعىندا، بۇل جەكەلەگەن مەملەكەتتەرگە قاجەت سوعىستىڭ ءبىر ءتۇرى.
جاھانداعى ەڭ جويقىن لاڭكەستىك شابۋىل اقش-تا بولدى. ۇشاقتى «الىپ قاشقان» تەررورشىلار ونى ەگىز-مۇناراعا باعىتتادى. مۇنى سىلتاۋ ەتكەن امەريكا مۇسىلمان الەمىنە «كرەست جورىعىن» جاريالاپ، اۋعانستان مەن يراكقا باسىپ كىردى. كەيىننەن ءدال وسى سەبەپپەن ليۆيا مەن سيريانىڭ استان-كەستەنىن شىعاردى.
انىعىندا، تەررور باتىسقا ەمەس، يسلام الەمىنە، ونىڭ ىشىندە – تۇركياعا باعىتتالىپ وتىر.
ءيا، بۇعان قارسى شىعاتىندار بار. «ەندەشە ولاردىڭ بريۋسسەلدە نەسى بار ەدى؟» دەيدى ولار.
اسىقپاڭىزدار! بۇل شاحمات ويىنى! ەلەستەتىپ كورىڭىز، ەۋروپاعا باعىتتالعان لاڭكەستىك شابۋىلدار ۇدەي ءتۇستى دەيىك. ەرتەڭگى كۇنى «وركەنيەتتى الەم» بۇعان كىمدى كىنالاۋى مۇمكىن؟ ارينە، يسلام الەمىن جانە تۇركيانى.
ويلاپ قاراڭىز، تىپ-تىنىش جاتقان سيريانىڭ استان-كەستەنىن شىعارىپ، «قارۋلى وپپوزيسيانى» قارجىلاندىرىپ، تەرروريستەردى جاتتىقتىرعان جانە اتالعان ايماقتى قانعا بوكتىرگەن كىم؟
انىعىندا، بريۋسسەلدەگى شابۋىل فرانسيا مەن گەرمانيانىڭ مىسىن باسۋ ءۇشىن جاسالىپ وتىر. سەبەبى، بۇل ەكەۋى تۇركيا مەن كۇللى يسلام الەمىنە قاتىستى اقش پەن ۇلىبريتانيانىڭ كوزقاراسىنا ساي كەلمەيتىن بولەك باعدار، باسقا ساياسات ۇستانىپ وتىر.
مىنانى ەسكە سالايىق: 2001 جىلعى 21 ماۋسىمدا امەريكالىق ساياساتكەر ءارى ەكونوميست ليندون لارۋش ءبىر عانا لوندوندا – «مۇسىلمان باۋىرلار»، «ءال-جيحاد»، حاماس، «يسلام اسكەرى»، «تاميل» سياقتى حالىقارالىق ءارى ەڭ ءقاۋىپتى دەگەن لاڭكەستىك ۇيىمداردىڭ ورتالىقتارى ورنالاسقانىن مالىمدەدى.
سونىمەن قاتار اقش-تىڭ تەرروريستىك قۇرىلىمدار تىزىمىندە تۇرعان 30 ۇيىمنىڭ 16-سى ۇلىبريتانيانىڭ تاراپىنان اسكەري جانە لوگيستيكالىق كومەك الاتىنىن جايىپ سالدى.
سوندا مۇنىڭ ءبارى نە ءۇشىن؟ «بارشاعا ورتاق قۇندىلىقتاردىڭ» بەرەكەسىن كەتىرىپ وتىرعان كىمدەر جانە مۇنداي جاعدايدا تەررور كىمگە ءقاۋىپ توندىرەتىنىن ويلاندىق پا؟
