ۇلتتىق ەكونوميكا ءمينيسترى، پرەمەر-مينيستردىڭ ورىنباسارى سەرىك جۇمانعارين ماجىلىستە وتكەن بريفينگتە ەڭ تومەنگى جالاقى مولشەرىنە قاتىستى ساۋالدارعا جاۋاپ بەرىپ، 85 مىڭ تەڭگە كولەمىندەگى جالاقىعا كۇن كورۋ مۇمكىن ەمەستىگىن اشىق ايتتى، دەپ حابارلايدى Dalanews.kz.
جۋرناليستەر ازىق-تۇلىك باعاسىنىڭ كۇرت وسۋىنە الاڭداپ، “ەڭ تومەنگى كۇنكورىس دەڭگەيى مەن ەڭ تومەنگى جالاقىنى قايتا قاراۋ قاجەت ەمەس پە؟” دەگەن ساۋال قويدى.
“بۇل ەكى كورسەتكىش ۇنەمى باقىلاۋدا. اسىرەسە ەڭ تومەنگى جالاقى دەڭگەيى. ۇكىمەت بۇل باعىتتا جۇيەلى جۇمىس جۇرگىزىپ كەلەدى. باعانىڭ ءوسىپ كەتكەنى راس. بۇل ماسەلەدە سىزدەرمەن تولىق كەلىسەمىن”، – دەدى جۇمانعارين.
ال “85 مىڭ تەڭگەگە ءوزىڭىز كۇن كورە الاسىز با؟” دەگەن سۇراققا ۆيسە-پرەمەر:
“جوق، مەن ول اقشاعا كۇن كورە الماس ەدىم. ءبىراق بۇل ەڭ تومەنگى جالاقى – ەسەپتىك شەك. ياعني، جۇمىس بەرۋشى ودان تومەن تولەي المايدى دەگەندى بىلدىرەدى. بۇل دەگەنىمىز – بارىنە ءدال وسى سومانى تولەۋ كەرەك دەگەن ءسوز ەمەس”، – دەپ جاۋاپ بەردى.
