"الماتىلىق اياجان ەدىلوۆا ءىز-تۇسسىز جوعالىپ كەتكەنى تۋرالى حابار 20 ناۋرىز كۇنى كەلىپ ءتۇستى. ءىس تىركەلگەن سوڭ، جەدەل ىزدەستىرۋ شارالارى جۇرگىزىلدى. ناتيجەسىندە 21 ناۋرىزدا تۇنگى ساعات 22:00-دە جوعالعان قىزدىڭ ەڭ سوڭعى بارعان مەكەنجايى انىقتالدى. الاتاۋ اۋدانى نۇركەنت ىقشام اۋدانىندا كۇدىكتىنىڭ تۇراتانى بەلگىلى بولدى. كۇدىكتى 1993 جىلعى ازامات، ونىڭ ۇيىنە كىرۋ ءۇشىن پوليسەيلەر ەسىكتى بۇزۋعا تۋرا كەلدى. پاتەرگە باسىپ كىرگەن پولسيەيلەردى كورگەن ازامات وزىنە قول سالماقشى بولعان. جەدەل جاردەم شاقىرتىلىپ، كۇدىكتى اۋرۋحاناعا جەتكىزىلدى. ءقازىر ول تۇتقىنداۋلى"، - دەدى الماتى قالاسى پوليسيا دەپارتامەنتى باسشىسىنىڭ ورىنباسارى رۋستام ابدراحمانوۆ.
بۇعان قوسا، مارقۇمنىڭ بولشەكتەنگەن دەنەسى تابىلعانى راستالدى. پوليسەيلەردىڭ مالىمەتىنشە، كۇدىكتى ءمايىتتىڭ كوزىن قۇرتۋ ءۇشىن وسىلاي ىستەگەن. ول وسىلايشا قىلمىسىن جاسىرماق بولعان.
قايتىس بولعان قىزدىڭ اعاسىنىڭ ايتۋىنشا، كۇدىكتىنىڭ جوعارى مەديسينالىق ءبىلىمى بار. وتباسى دا وقىعان، ءبىلىمدى ادامدار كورىنەدى.
"كۇدىكتىنىڭ سوزىنشە، ول بويجەتكەندى 19-نان 20 ناۋرىزعا قاراعان ءتۇنى، شامامەن 23:00 مەن 00:00 شاماسىندا ولتىرگەن. ياعني، قىلمىس اياجان ەدىلوۆانىڭ جوعالعانى تۋرالى حابار كەلىپ تۇسپەي تۇرىپ بولعان. بويجەتكەن دەنەسىنىڭ كەي بولىكتەرى الاتاۋ اۋدانى مەن بوستاندىق اۋدانىنداعى قوقىس جاشىكتەرىنەن تابىلدى. سوت ساراپتاماسى تاعايىندالدى. قىلمىس پاتەردە ورىن العان"، - دەپ قوستى ول.
كوپ قاباتتى ءۇيدىڭ تۇرعىندارى پاتەردەن ءبىرتۇرلى دىبىستار ەستىمەگەنىن ايتادى. بارلىعى تىنىش بولعان.
پد تاراتقان مالىمەتتەرگە سايكەس، كۇدىكتى مەن بويجەتكەن الەۋمەتتىك جەلى ارقىلى تانىسقان. ۇستالعان ازامات بۇرىن سوتتالماعان. كۇدىكتى وسى ۋاقىتقا دەيىن ءتىپتى اكىمشىلىك جاۋاپكەرشىلىككە دە تارتىلماپتى.
"مارقۇم كۇدىكتىمەن Badoo جەلىسى ارقىلى تانىسىپ، ۇيىنە بارعان. كۇدىكتى مەن زارداپ شەگۋشىنىڭ اراسىندا جىنىستىق قاتىناس بولعان-بولماعانى بەلگىسىز. ەكەۋى ءۇش كۇندەي تانىس بولعان. ەر ازاماتتىڭ سوزىنشە، ولاردىڭ اراسىندا جانجال تۋىپ، ارتىنشا اشۋعا بۋلىققان ول قىزدى ولتىرگەن"، - دەدى پد وكىلدەرى.
ءۇيدىڭ اۋلاسىندا جانە دالىزىندە ورنالاسقان بەينەباقىلاۋ كامەرالارىندا قىزدىڭ ۇيگە ءوز ەركىمەن كىرگەنى انىق كورىنگەن. بويجەتكەننىڭ نەدەن كوز جۇمعانى الداعى ۋاقىتتا انىقتالاتىن بولادى.
ءوز كەزەگىندە قىزدىڭ تۋىستارى بەيتانىس ەر اداممەن نە سەبەپتى كەزدەسۋگە بارعانى تۋرالى بىرنەشە بولجام ۇسىنىپ وتىر.
"سولاردىڭ ءبىرى ينتەرنەت-دۇكەننىڭ جۇمىستارىمەن بارۋى مۇمكىن دەگەن بولجام. ال وسىعان دەيىن ەر اداممەن جاڭادان تانىسىپ، قارىم-قاتىناس ورناتپاق بولىپ، كەزدەسۋگە بارعان دەگەن نۇسقا جوققا شىعارىلدى. ويتكەنى بويجەتكەننىڭ جىگىتى بولعان كورىنەدى"، - دەيدى NemolchiKZ قورىنىڭ نەگىزىن قالاۋشى دينا ءتاڭسارى.
ەسكە سالساق، وسىعان دەيىن الماتىدا 19 جاستاعى قىز تۇندە جۇمىستان شىعىپ ۇيىنە ورالماعانى تۋرالى حابارلانعان.
2021 جىلدىڭ 19 ناۋرىزىندا ساعات 20.48-دە بويجەتكەن قونايەۆ كوشەسى 43 مەكەن-جايى بويىنشا جۇمىستان شىققانىن سوڭعى رەت باقىلاۋ كامەرالارى تىركەگەن. ءبىراق ۇيىنە ورالماعان. ونىڭ ۇستىندە قارا كۋرتكا، كەڭ قارا دجينسى، باسىندا قارا بەرەت بار. قولىنا قىزعىلت سومكە ۇستاعان.
19 ناۋرىزدا جوعالىپ كەتكەن الماتى تۇرعىنى اياجان ەدىلوۆا ءولى كۇيىندە تابىلدى. الماتى پوليسياسى كۇدىكتىنى ۇستادى.
"حابار-وشارسىز كەتكەن ادامنىڭ تۇرعان جەرىن جانە ونىڭ جوعالۋ جاعدايلارىن انىقتاۋ ءۇشىن جەدەل-تەرگەۋ توبى قۇرىلدى. جەدەل-ىزدەستىرۋ ءىس-شارالارىن جۇرگىزۋ بارىسىندا بويجەتكەننىڭ جوعالىپ كەتكەن كۇنى الەۋمەتتىك جەلىلەردە تانىسقان جاڭا تانىسىمەن كەزدەسۋگە جينالعانى انىقتالدى.
قىزدىڭ قىلمىستىق ارەكەتتەرىنىڭ قۇربانى بولعاندىعى انىقتالدى. كۇدىكتى-تۇركىستان وبلىسىنىڭ تۇرعىنى، 1993 جىلى تۋعان ازامات ۇستالدى. تەرگەۋ امالدارى جۇرگىزىلىپ جاتىر، سونىڭ ىشىندە كىسى ءولتىرۋدىڭ سەبەبى مەن ءتاسىلىن انىقتاۋ ماقساتىندا"، - دەدى الماتى پد كريمينالدىق پوليسيا باسقارماسىنىڭ باستىعى ەركىن ىڭكاروۆ.
