شىمكەنتتە رۋسلان بەردەنوۆكە جاسالعان قارۋلى شابۋىل قوعامدا ۇلكەن رەزونانس تۋدىردى. جۋرناليست بوتاگوز وماروۆانىڭ ايتۋىنشا، كۇدىكتى ەرنار جيەنباي – بۇرىنعى پروكۋروردىڭ ۇلى ءارى "تۇرعىن ءۇي شىمكەنت" ءجشس-نىڭ باسشىسى، دەپ حابارلايدى Dalanews.kz.
ونىڭ سوزىنشە، بۇل كومپانيا قالادا كوپقاباتتى تۇرعىن ۇيلەردى كۇردەلى جوندەۋدەن وتكىزۋگە بولىنگەن 3،4 ميلليارد تەڭگەنى تەندەرسىز يگەرگەن.
"رۋسلان بەردەنوۆكە وق اتقان ەرنار جيەنباي كەزدەيسوق تۇلعا ەمەس. ول – پروكۋرورلار وتباسىندا دۇنيەگە كەلىپ، كەيىن "تۇرعىن ءۇي شىمكەنت" ءجشس-نىڭ باسشىسى اتانعان. ەڭ باستىسى بۇل كومپانيا تەندەر وتكىزبەستەن-اق ميللياردتاعان قارجىنى يەمدەنگەن"، - دەيدى ول.
ءجۋرناليستىڭ ايتۋىنشا، 2024–2026 جىلدارعا ارنالعان جوندەۋ باعدارلاماسى اياسىندا "تۇرعىن ءۇي شىمكەنت" كومپانياسىنا مەملەكەتتىك ساتىپ الۋ ءراسىمىنسىز 3،4 ملرد تەڭگە بولىنگەن. الايدا جوسپارلانعان 22 ءۇيدىڭ تەك 10-ىندا عانا جوندەۋ جۇمىستارى جۇرگىزىلگەن. قالعان قاراجاتتىڭ قايدا جۇمسالعانى تۋرالى ناقتى ەسەپ بەرىلمەگەن.
ءجۋرناليستتىڭ ايتۋىنشا، وقيعاعا دەيىنگى ون كۇن بۇرىن قالا اكىمدىگىندە وتكەن جيىندا ەرنار جيەنبايدان جۇمىس ەسەبى تالاپ ەتىلگەن.
"سول كەزدەسۋدە بەردەنوۆ قاراجاتتىڭ ناقتى قايدا جۇمسالعانىن سۇراعان. جيەنباي جاۋاپ بەرە الماي، اشۋعا بۋلىققان. كەيىن ونى زالدان شىعارىپ جىبەرگەن"، – دەيدى وماروۆا.
تەرگەۋ ورگاندارى بۇل ءىستى قىزعانىشتان تۋعان قىلمىس ەمەس، مۇمكىن بولاتىن قارجىلاي زاڭبۇزۋشىلىقتى جاسىرۋ ارەكەتى رەتىندە قاراستىرىپ جاتىر. وماروۆا بۇل نۇسقامەن كەلىسەتىنىن ايتتى.
"قىزعانىش دەگەن – تەك جازانى جەڭىلدەتۋ ءۇشىن ويلاپ تابىلعان سەبەپ. مۇنداي جاعدايدا شارتتى تۇردە بوساپ شىعۋ دا ىقتيمال. ال ەندى "اسا ءىرى كولەمدەگى قارجى جىمقىرۋ" بابىمەن سوتتالسا، جازا تىم اۋىر، 12 جىلدان باستالادى جانە شارتتى تۇردە بوساپ شىعۋعا مۇمكىندىك جوق. سول سەبەپتى جيەنباي ءقازىر بارلىق تاسىلمەن رۋسلان بەردەنوۆتى قارالاۋعا تىرىسىپ جاتىر. ءتىپتى ارانداتۋ مەن جالا جابۋعا دەيىن بارىپ جاتقانى بايقالادى. ءبىراق قالاي بولعاندا دا، بۇل ىسكە بايلانىستى تاعىلعان ايىپ – وتە اۋىر. ەندى بارلىعى سوتتىڭ ادىلدىگىنە بايلانىستى. دەگەنمەن، شىنايى سوت تورەلىگىن كۇتۋگە سەبەپ از.
بىرىنشىدەن، شىمكەنتتەگى زاڭسىزدىقتار مەن ادىلەتسىزدىكتەر تۋرالى ەل اراسىندا ايتىلىپ جۇرگەن اڭگىمە از ەمەس. ەكىنشىدەن، ەرنار جيەنباي — بۇرىنعى پروكۋروردىڭ بالاسى. ال "بۇرىنعى پروكۋرور" دەگەن ۇعىم بۇل جۇيەدە جاي عانا اتاق ەمەس..."، - دەيدى ول.
بۇعان دەيىنگى جاعداي
ەسكە سالايىق، بۇعان دەيىن رۋسلان بەردەنوۆ سوتقا كەلۋگە مىندەتتەلگەنى حابارلاندى. سوت وتىرىسىندا سۋديا ءابىنۇر قارابايەۆ رۋسلان بەردەنوۆتى 6 تامىزعا جوسپارلانعان نەگىزگى سوت پروسەسىنە مىندەتتى تۇردە قاتىسۋعا شاقىردى.
