بۇعان دەيىن كۇدەبايەۆتىڭ ءساۋىردىڭ 3ء-ى كۇنى سوتقا ءماجبۇرلى تۇردە جەتكىزىلەتىنى جانە سول كۇنى وعان ۇكىم وقىلاتىنى حابارلانعان.
ايىپتاۋشى تاراپ قاڭتار وقيعاسى كەزىندە جۇمىس ورنىن تاستاپ كەتكەن الماتى وبلىستىق پوليسياسىنىڭ بۇرىنعى باسشىسىن 9 جىلعا باس بوستاندىعىنان ايىرۋدى سۇراپ وتىر.
سەرىك كۇدەبايەۆتىڭ سوتى قاڭتار ايىندا باستالعان. ول قاڭتار وقيعاسى بويىنشا كۇدىكتى دەپ تانىلعان. انىقتالعانداي، الماتى وبلىسىنىڭ پد بۇرىنعى باسشىسى "اۋىر زارداپتارعا اكەپ سوقتىرعان قىزمەتتەگى ارەكەتسىزدىك" دەگەن كۇدىككە ىلىنگەن.
كۇدەبايەۆ 2020 جىلدىڭ قاڭتارىنان باستاپ الماتى وبلىسىنىڭ پوليسيا دەپارتامەنتىنىڭ باستىعى قىزمەتىن اتقارعان، ال 2022 جىلدىڭ 18 اقپانىندا ىشكى ىستەر ورگاندارىنان ءوز ەركىمەن بوساتىلدى.
كۇدەبايەۆتىڭ قورعاۋشىسى ساۋلە ءابجانوۆا ونىڭ قايدا جۇرگەنىنەن حابارسىز بولىپ شىقتى.
"ازاتتىققا" پىكىر بىلدىرگەن ءابجانوۆا:
"ول سوڭعى سوت وتىرىسىنا قاتىسقان جوق. سول سەبەپتى (ونى) سوتقا ءماجبۇرلى تۇردە جەتكىزۋ تۋرالى شەشىم قابىلدانعان. ءبىز ونىڭ ورنالاسقانىن جەرىن بىلمەيمىز"، – دەدى.
ادۆوكاتتىڭ ءمالىم ەتكەنىندەي، كۇدەبايەۆتىڭ ەت جاقىندارى گەنەرالدىڭ قولىندا جەكە كلينيكادا ەم-دوم الۋعا رۇقسات بەرەتىن قۇجاتى بارىن ايتقان. تەرگەۋ امالدارى ءجۇرىپ جاتقان تۇستا وعان ەلدەن شىعۋعا شەكتەۋ قويىلعان، الايدا ونىڭ مەرزىمى ءوتىپ كەتكەنى بەلگىلى بولدى.
قاڭتاردان سوڭ تالدىقورعاندا شەرۋگە شىققاندار جاپپاي قامالىپ ولار جانتۇرشىگەرلىك ازاپپەن ازاپتالعان. ۇتىك باسىلىپ، تىرناقتارىنىڭ كوبەسىنە شەگە سۇعىلعان، تىستەرى جۇلىنىپ، قول-اياق، قابىرعالارى سىندىرىلعان. الايدا ازاپتاۋشىلاردىڭ دەنى ماسكامەن جۇرگەندىگىن العا تارتقان قۇزىرلى ورگان ابىرلەنۋشىلەردىڭ كوبىنىڭ ءىسىن توقتاتىپ تاستاعان.
تەك 23 جابىرلەنۋشىنىڭ ارىزىمەن 5 پوليسيا قىزمەتكەرى قاماۋعا الىنىپ 3-5 جىلعا سوتتالعان بولاتىن. ونىڭ ءبىرى ارنايى جاساق قىزمەتكەرى ەرمەك جۇماشيەۆ ءوزىنىڭ تەك گەنەرال كۇدەبايەۆقا عانا باعىنعانىن، تەك سونىڭ عانا بۇيرىعىن ورىندايتىنىن ايتقان.
Foto: Orda.kz
