قازاق حالقىنىڭ ۇلتتىق ويىندارىنىڭ 7 تۇرىنەن (جامبى اتۋ، اسىق اتۋ، قوشقار كوتەرۋ، قازاقشا كۇرەس، اۋدارىسپاق، توعىزقۇمالاق، ارقان تارتىس) وتكەن سايىستى اۋدان اكىمى تولەگەن تۇرتاي ۇلى اشىپ، جارىسقا قاتىسىپ جاتقان 14 اۋداننان كەلگەن كوماندالارعا ساتتىلىك تىلەدى. ستاديون اۋماعىنا كيىز ءۇي تىگىلىپ، قازاقتىڭ ۇلتتىق تاعامدارىنان داستارقان جايىلدى.
سايىسقا 14 جانە 29 جاس ارالىعىنداعى جاستار قاتىستى. ءدۇبىرلى دودادا كوماندالىق ەسەپ بويىنشا تولەبي اۋدانى جۇلدەلى ءبىرىنشى ورىندى جەڭىپ الدى. سپورتتىڭ جەكەلەگەن تۇرلەرى بويىنشا جەڭىمپاز اتانعانداردى قازىعۇرت اۋدانىنىڭ اكىمى ارمان ابدۋللايەۆ، ورداباسى اۋدانىنىڭ اكىمى باعلان باتىرشايەۆ، تولەبي اۋدانىنىڭ اكىمى تولەگەن تەلعارايەۆ قۇتتىقتاسا، كوماندالىق ەسەپ بويىنشا وزىپ شىققاندارعا تۇركىستان وبلىسى اكىمىنىڭ ورىنباسارى ساكەن قالقامانوۆ مەدال تاعىپ، كۋبوك ۇسىندى.
جامبى اتۋ سايىسىندا ءىىى-ورىندى – تۇلكىباس اۋدانى، ءىى-ورىندى - ارىس قالاسى، ءى-ورىندى – تولەبي اۋدانى يەمدەندى. ال اۋدارىسپاقتا ءىىى-ورىندى - وتىرار اۋدانى، ءىى-ورىندى – قازىعۇرت اۋدانى، ءى-ورىندى – تولەبي اۋدانى جەڭىپ الدى. قوشقار كوتەرۋدەن ءىىى-ورىندى – بايدىبەك اۋدانى، ءىى-ورىندى - تولەبي اۋدانى، ءى-ورىندى – وتىرار اۋدانى الدى. توعىزقۇمالاق ويىنىنان ءىىى-ورىن – وتىرار اۋدانىنا، ءىى-ورىن – سارىاعاش اۋدانىنا، ءى-ورىن – بايدىبەك اۋدانىنا بۇيىردى. قازاقشا كۇرەستەن ءىىى-ورىندى – تۇلكىباس اۋدانى، ءىى-ورىندى – كەلەس اۋدانى، ءى-ورىندى – بايدىبەك اۋدانى يەمدەندى.
«كوشپەندىلەر ويىنى» اتتى وبلىستىق سايىسىندا كوماندالىق ەسەپ بويىنشا ءىىى-ورىنعا – وتىرار اۋدانى، ءىى-ورىنعا – بايدىبەك اۋدانى، ءى-ورىنعا – تولەبي اۋدانى جايعاستى.
