قۇلسارىدا ءقاۋىپ ءالى سەيىلمەگەنىن جەرگىلىكتى تۇرعىندار الەۋمەتتىك جەلىدەگى ۆيدەولار ارقىلى تاراتىپ جاتىر، دەپ حابارلايدى Dalanews.kz.
سوڭعى دەرەكتەرگە قاراعاندا، قۇلسارىدان كوشىرىلگەن ادام سانى 30 مىڭعا جۋىقتاعان. ال سۋعا كەتكەن ۇيلەر مەن ينفراقۇرىلىم نىساندارى سانى 3 مىڭعا جۋىقتاعان.
قۇلسارىعا پرەمەر-مينيستر ولجاس بەكتەنوۆ بارعان. قۇلسارىداعى سۋ تاسقىنى جاعدايىن تەكسەرىپ، تۇرعىنداردىڭ سۇراقتارىنا جاۋاپ بەرگەن. ول سۋ تاسقىنىنا قارسى ءىس-شارالاردى ۇيلەستىرۋ جانە سۋ تاسقىنى كەزەڭىنىڭ سالدارىن جويۋ جونىندەگى رەسپۋبليكالىق شتابتىڭ جەتەكشىسى. اتىراۋ وبلىسىنداعى اعىمداعى جاعدايدى تەكسەرىپ، اۋماقتى تىكۇشاقپەن ارالاپ، وزەن جاعالاۋلارىن نىعايتۋ جۇمىستارىنىڭ بارىسىن قاراعان.
بەكتەنوۆ قۇلسارى قالاسىنىڭ تۇرعىندارىمەن سويلەسىپ، ولاردىڭ قابىلدانىپ جاتقان شارالاردى كۇشەيتۋ بويىنشا سۇراقتارىنا جاۋاپ بەرگەن. سونداي-اق جايىق جانە جەم وزەندەرىندەگى جاعدايمەن تانىسقان.
جىلىوي جانە قىزىلقوعا اۋداندارىندا جەرگىلىكتى اۋقىمداعى تابيعي سيپاتتاعى تج رەجيمى ساقتالىپ وتىر.
بۇگىندە قىزىلقوعا اۋدانىنداعى ميالى، اققورا، جانگەلدين، جاسقايرات جانە كوزدىقارا اۋىلدارىندا قاۋىپ-قاتەر سەيىلگەن. اقتوبە وبلىسى ويىل اۋدانى جاعىنان جەم وزەنى دەڭگەيىنىڭ كوتەرىلۋىنە بايلانىستى جىلىوي اۋدانى قۇلسارى قالاسىن سۋ باسقان.
28 551 ادام ەۆاكۋاسيالانعان.
وڭىردە كەلەتىن سۋ ازايتۋ كولەمىن ازايتۋ ءۇشىن جەم وزەنىنىڭ ساعاسى ءۇش جاعىنان قازىلدى، سونداي-اق جەم وزەنىنىڭ بويىندا ورنالاسقان جاساندى بوگەتتەر بۇزىلدى. بۇل وزەن ارناسىنىڭ باعىتىن وزگەرتۋگە جانە سۋدىڭ كەدەرگىسىز اعۋىن قامتاماسىز ەتۋگە، ونىڭ كاسپيي تەڭىزىنە قاراي وتكىزۋ قابىلەتىن ۇلعايتۋعا جانە سۋ تاسقىنى ءقاۋپىن ازايتۋعا مۇمكىندىك بەرەدى.
ءوز كەزەگىندە تۇرعىندار مەن ۆولونتەرلەر تۇرعىن ءۇي سەكتورىن سۋ باسۋىنا جول بەرمەۋ بويىنشا جۇمىستار جۇرگىزىپ جاتىر.
