ايتۋلى شاراعا مەملەكەت جانە قوعام قايراتكەرلەرى، ق ر سەناتى مەن ءماجىلىس دەپۋتاتتارى، الماتى قالاسى اكىمدىگىنىڭ جانە قوعامدىق ۇيىمداردىڭ وكىلدەرى، تاريحشى عالىمدار مەن ساراپشىلار قاتىستى.
كونفەرەنسيانىڭ اشىلۋىندا ق ر پارلامەنتى سەناتىنىڭ ءتوراعاسى ماۋلەن اشىمبايەۆتىڭ قۇتتىقتاۋ حاتىن ق ر پارلامەنتى سەناتىنىڭ الەۋمەتتىك-مادەني دامۋ جانە عىلىم كوميتەتىنىڭ ءتوراعاسى مۇرات باقتيار ۇلى وقىدى. حاتتا: «تاۋەلسىزدىگىمىزدىڭ 30 جىلدىعىنا بايلانىستى ءىس-شارالار حالىققا رۋحاني سەرپىلىس اكەلۋى قاجەت. بۇل تاريحي داتانىڭ ءمانى مەن ماڭىزىن حالىققا ءتۇسىندىرۋ، اشىپ كورسەتۋ وتە ماڭىزدى. وسى تۇرعىدان العاندا «قازاق ەلىنىڭ جاڭا ءداۋىرى» اتتى حالىقارالىق عىلىمي-پراكتيكالىق كونفەرەنسيانىڭ بەرەرى مول»، – دەلىنگەن.
سونىمەن قاتار ق ر پارلامەنتى ءماجىلىسىنىڭ ءتوراعاسى نۇرلان ءنىعماتۋليننىڭ، ءبىلىم جانە عىلىم ءمينيسترى اسحات ايماعامبەتوۆتىڭ جانە الماتى قالاسىنىڭ اكىمى باقىتجان ساعىنتايەۆتىڭ قۇتتىقتاۋ حاتتارى وقىلدى.
ق ر پارلامەنتى ءماجىلىسىنىڭ ءتوراعاسى نۇرلان ءنىعماتۋليننىڭ كونفەرەنسياعا قاتىسۋشىلارعا جولداعان حاتىندا: «مەملەكەتىمىزدىڭ تاعدىرى مەن بولاشاعى ءاربىر قازاق ەلى ازاماتىنىڭ، اسىرەسە ءبىلىمدى دە تالاپتى جاستاردىڭ قولىندا. ءال-فارابي اتىنداعى قازۇۋ وسى جولدا ەرەكشە ءرول اتقارىپ وتىر»، – دەلىنگەن.
كونفەرەنسيا بارىسىندا ق ر پارلامەنتى ءماجىلىسىنىڭ دەپۋتاتى جۇلدىز سۇلەيمەنوۆا ونلاين قوسىلىپ، «تاۋەلسىزدىك تۇعىرىن نىعايتۋدا قازۇۋ-دىڭ ۇلەسى زور. وتاندىق عىلىم، ءبىلىم سالاسىنىڭ بىلىكتى كادرلارى ەگەمەن ەلىمىزدىڭ كەمەل كەلەشەگىن قالىپتاستىرۋعا ەلەۋلى ۇلەس قوسىپ كەلەدى»، – دەدى.
جيىنعا قاتىسۋشىلار قازاقستاننىڭ الەمدىك قاۋىمداستىقتاعى الاتىن ورنى مەن ماڭىزىن، سىرتقى ساياسي قاتىناستارىنىڭ قالىپتاسۋ ۇدەرىسى تۋرالى كەلەلى ويلارىن ورتاعا سالدى.
كونفەرەنسيادا ۇلت تاريحىنداعى ماڭىزدى وقيعالارعا شولۋ جاسالىپ، تاۋەلسىزدىگىمىزدىڭ باستاۋىندا تۇرعان تۇعىرلى تۇلعالار تۋرالى دا كەڭىنەن ءسوز بولدى.
جيىن قورىتىندىسىندا عالىمدار «بۇگىنگى كونفەرەنسيا تاۋەلسىز قازاقستان تاريحىنىڭ الەمدىك دەڭگەيدە زەرتتەلۋىنە جاڭا سەرپىن بەرەدى» دەپ اتاپ ءوتتى.
ۇلتىمىزدىڭ جاڭا داۋىردەگى تاريحىن زەردەلەگەن كونفەرەنسيا ماتەريالدارى الداعى ۋاقىتتا ارنايى جيناققا توپتاستىرىلىپ، تاريحشىلار قاۋىمىنا، ىزدەنىس جولىنداعى جاس عالىمدار مەن ءبىلىم الۋشىلارعا ۇسىنىلاتىن بولادى.
