كولىك ءمينيسترى مارات قارابايەۆ وتاندىق تاسىمالداۋشىلاردىڭ شەتەلدىك كومپانيالاردىڭ مۇددەسىن قورعادى دەگەن ايىپتاۋلارى مەن شاعىمدارىنا جاۋاپ بەردى. مينيستر اتاپ وتكەندەي، بۇل نارازىلىقتار جاڭا قۇجات كۇشىنە ەنگەننەن كەيىن ەكى ساناتتاعى تاسىمالداۋشىلار تاراپىنان تۋىنداعان. ءبىرىنشىسى – بۇرىنعى مونوپوليستەر، ال ەكىنشىسى – بلانك ساتۋدى كاسىپ ەتكەندەر، دەپ حابارلايدى Dalanews.kz.
"وكىنىشكە قاراي، بۇعان دەيىنگى بۇيرىقتارىمىزدا شەتەلدىك رۇقسات بلانكىلەرى “تاريحي جادى” نەگىزىندە بولىنەتىن. ياعني، كىم بۇرىن السا، سول كومپانيالار سول كولەمدە – 70%-عا دەيىن بلانك الاتىن، قالعان 30%-ى عانا وزگەلەرگە تيەسىلى بولاتىن. ءقازىر بۇل مونوپوليالىق جۇيە جويىلدى"، – دەدى قارابايەۆ.
ءمينيستردىڭ ايتۋىنشا، ەندى شەتەلدىك رۇقسات بلانكىن الۋ ءۇشىن سوڭعى التى ايدا ناقتى جۇك تاسىمالداعانىن دالەلدەيتىن قۇجاتتار – تاۋار نومەنكلاتۋراسى تالاپ ەتىلەدى.
“سونىڭ ناتيجەسىندە شەتەلدىك رۇقسات بلانكىلەرىن الۋعا قۇقىعى بار اۆتوكولىك قۇرالدارىنىڭ سانى 90 مىڭنان 33 مىڭعا دەيىن ازايدى. ياعني، بۇل 57 مىڭ اۆتوكولىك قۇرالى شىن مانىندە تاسىمالمەن اينالىسپاعان، تەك قۇجات ارقىلى پايدا تاپقىسى كەلگەن”، – دەپ ءتۇسىندىردى مينيستر.
بۇرىن شەتەلدىك رۇقسات بلانكىسى بوس كۇيىندە بەرىلەتىن، دەپ قوستى مينيستر. ءقازىر بۇل قۇجاتتا كومپانيانىڭ اتاۋى مەن كولىك ءنومىرى كورسەتىلەدى، بۇل ونى قايتا ساتۋعا جول بەرمەيدى. سونىمەن قاتار بلانكىنىڭ ارەكەت ەتۋ مەرزىمى 30 كۇنگە دەيىن قىسقارتىلدى.
“بۇرىن بۇل بلانك 100 كۇنگە دەيىن جارامدى بولاتىن. ونى العاننان كەيىن قولدانباي، نارىقتاعى سۇرانىس ارتقانىن كۇتىپ، كەيىن جاسىرىن نارىقتا 3-5 مىڭ دوللارعا دەيىن ساتىپ وتىرعاندار بولدى”، – دەدى مينيستر.
مارات قارابايەۆتىڭ مالىمدەۋىنشە، بۇل وزگەرىستەردىڭ ارقاسىندا ەۋروپاعا تاسىمال باعاسى 12-14 مىڭ دوللاردان 7-9 مىڭ دوللارعا دەيىن تومەندەگەن.
ايتا كەتەيىك، بۇعان دەيىن كولىك ءمينيسترى مارات قارابايەۆ پرەزيدەنتتەن سوگىس العانىن قالاي قابىلداعانىن ايتقان ەدى.
ءمينيستردىڭ پىكىرى
سەنات دالىزىندە مارات قارابايەۆ ساياسي مەملەكەتتىك قىزمەتكەر ەكەنىن جانە مەملەكەت باسشىسىنىڭ شەشىمدەرىن تالقىلاۋعا قۇقىعى جوق ەكەنىن مالىمدەدى.
"پرەزيدەنت الدىمىزعا قويعان تاپسىرمالاردى ۋاقتىلى جانە ساپالى ورىنداۋ ءۇشىن ءبارىمىز بىرگە جۇمىس ىستەيمىز. مەملەكەتتىك ورگاننىڭ ءبىرىنشى باسشىسى رەتىندە وزىمە كورسەتىلگەن سەنىمدى اقتاۋ ءۇشىن بار كۇشىمدى سالامىن"، - دەپ جاۋاپ بەردى قارابايەۆ.
بۇعان دەيىنگى جاعداي
ەسكە سالايىق، 14 مامىردا پرەزيدەنت قاسىم-جومارت توقايەۆتىڭ توراعالىعىمەن قازاقستان رەسپۋبليكاسى قاۋىپسىزدىك كەڭەسىنىڭ كولىك-لوگيستيكا سالاسىن دامىتۋ ماسەلەلەرى جونىندەگى وتىرىسى ءوتتى. كولىك ءمينيسترى مارات قارابايەۆتىڭ جانە ءبىرقاتار ورتالىق مەملەكەتتىك ورگاندار باسشىلارىنىڭ باياندامالارى تىڭدالدى.
مەملەكەت باسشىسى كولىك سالاسىنداعى احۋالدى سىنعا الدى. قوردالانعان پروبلەمالار مەن بەلگىلەنگەن مەجەلەردىڭ ورىندالماۋى جاڭعىرتۋ جۇمىستارىن جۇرگىزۋگە كەدەرگى كەلتىرىپ وتىرعانىن ايتتى.
جيىن سوڭىندا پرەزيدەنت مينيستر مارات قارابايەۆقا جۇمىس بارىسىندا جىبەرگەن كەمشىلىكتەرى ءۇشىن سوگىس جاريالادى.
مەملەكەت باسشىسى كولىك-لوگيستيكا سالاسىنداعى پروبلەمالاردى شەشۋگە قاتىستى ناقتى شارالار قابىلداۋدى تاپسىردى.
