ق ر پرەمەر-مينيسترى ولجاس بەكتەنوۆ كوكشەتاۋداعى قازاندىقتاردى جوندەۋگە ۇكىمەت رەزەرۆىنەن قاراجات ءبولۋ تۋرالى قاۋلىعا قول قويدى، دەپ حابارلايدى Dalanews.kz.
اقمولا وبلىسىنىڭ بيۋدجەتىنە اعىمداعى نىسانالى ترانسفەرتتەر تۇرىندە №1 جانە №2 اۋداندىق قازاندىقتاردا ءتيىستى جۇمىستار جۇرگىزۋ ءۇشىن 816 ملن تەڭگەدەن استام قاراجات اۋدارىلادى. اتاپ ايتقاندا، كونۆەكتيۆتى بولىكتىڭ پاكەتتەرىن جانە قازاندىق اگرەگاتتارىن جوندەۋ، سونداي-اق قىزدىرۋ بەتتەرىن جانە شيكى كومىر بۋنكەرلەرىن اۋىستىرۋ جوسپارلانىپ وتىر.
اتالعان شارالاردى ىسكە اسىرۋ ناتيجەسىندە قازاندىقتاردىڭ تيىمدىلىگى ارتىپ، اپاتتار مەن توقتاپ قالۋ فاكتىلەرىنىڭ سانى ازايادى، بۇل الداعى جىلىتۋ ماۋسىمىنىڭ ىركىلىسسىز ءوتۋىن قامتاماسىز ەتۋگە مۇمكىندىك بەرەدى.
سونىمەن قاتار بۇگىندە كوكشەتاۋدا قالانىڭ جىلۋ جانە ەلەكتر ەنەرگياسىنا دەگەن ءوسىپ كەلە جاتقان قاجەتتىلىكتەرىن تولىق قامتاماسىز ەتۋگە ءتيىس تولىققاندى جەو سالۋ جوباسىن پىسىقتاۋ جۇمىستارى جالعاسۋدا. ونىڭ تەحنيكالىق كورسەتكىشتەرى جىلۋ قۋاتى – 520 گكال/ساع، ەلەكتر قۋاتى – 240 مۆت بولادى دەپ جوسپارلانىپ وتىر.
بۇل رەتتە كوكشەتاۋدى ودان ءارى گازداندىرۋدى ەسكەرە وتىرىپ، تابيعي گازعا كوشىرۋ مۇمكىندىگى بار ءتۇرلى وتىندى كومىرتوزاڭدى قازاندىقتار ورناتۋ كوزدەلگەن.
جوبا بيىلعى 17 ساۋىردە قازاقستان مەن رەسەي اراسىندا قول قويىلعان كەلىسىم شەڭبەرىندە جۇزەگە اسىرىلادى. قازاقستان تاراپىنان ۋاكىلەتتى ۇيىم "سامۇرىق-ەنەرگو" اق بيىل جەو جۇمىسىن باستاۋ ءۇشىن ءتيىستى جول كارتاسىن ازىرلەدى.
