بەلگىلى جازۋشى، تاريحشى قويشىعارا سالعارا ۇلى ەكس پرەزيدەنت نۇرسۇلتان نازاربايەۆتى كەزىندە ماقتاپ، بۇگىنگى كۇنى داتتاپ جۇرگەندەر تۋرالى پىكىر ءبىلدىردى، - دەپ حابارلايدى Dalanews.kz.
"كەزىندە ايت. سوندا سەن نازاربايەۆتى سىيلايتىن ەدىڭ، سوندا نازاربايەۆ ءوزى سياقتى جەمقورلاردى جينامايتىن ەدى. امال جوق، تۇزەلەتىن ەدى. مەن ءقازىر كەزىندە ايتتىم دەسەم ماقتانعان سياقتى بولامىن. ويتكەنى وعان كۋا ادام جوق. وسى دانىشپاندار كەزىندە نەگە ايتپادى؟ كەزىندە مەن ايتتىم. قۇداي كورىپ تۇر عوي، بەتىمنەن قاعىپ كورگەن جوق. ەركەلەتتى، تىڭدادى.
"قازاقتىڭ تاريحى قىتايدا جاتىر دەيدى، سوعان سەن بار" دەگەن. قىتايعا بارعان ساپارىندا كەلىسىپ كەلىپ، ءبىر ادامدى جىبەرەمىن دەگەن - نازاربايەۆ. ءۇش اۋدارماشىنى دايىنداپ، كولىگىمەن جىبەرگەن – نازاربايەۆ"، - دەيدى تاريحشى Bilgen Durys YouTube-ارناسىنا بەرگەن سۇحباتىندا.
قويشىعارا سالعارا ۇلى نازاربايەۆ بيلىكتە بولعان جىلدارى ول تۋرالى ءارتۇرلى ءسوز ايتىلعانىن جەتكىزدى.
"العاشقى 5-10 جىلدا "قۇداي ءبىزدىڭ باعىمىزعا بەرگەن ادام" بولدى. سودان كەيىنگى ون جىلدا "ءوزى جاقسى، ءبىراق توڭىرەگى تولعان وڭباعان عوي" دەدى. سودان كەيىنگى ون جىلدا "قۋ ءسوز عوي" دەدى. حالىقتىڭ بەرگەن باعاسى"، - دەيدى جازۋشى.
ايتا كەتەيىك،بۇعان دەيىن مەملەكەت قايراتكەرى، عالىم جاقسىبەك قۇلەكەيەۆ ەكس پرەزيدەنت نۇرسۇلتان نازاربايەۆتى كەشىرۋدى سۇراعان بولاتىن.
"ەلباسى دا پەندە، ول دا اكە. ول دا اتا. نەمەرە، شوبەرە ءسۇيىپ وتىر. وتباسىنىڭ اينالاسىنداعىلارعا قاتىستى قوعامدا ايتىلىپ جاتقان پىكىرلەرگە و كىسى الاڭدامايدى ەكەن، قىنجىلمايدى ەكەن دەپ ايتۋ وتە قيىن. ول دا ەت پەن سۇيەكتەن جارالعان ادام عوي. مەنىڭشە، و كىسىنى ءدال ءقازىر تابالاۋدىڭ قاجەتى جوق. قولىمىزدان كەلەتىن بولسا، ەگەمەندىك ءۇشىن، كەلەشەك ۇرپاق ءۇشىن و كىسىنىڭ جاقسى اتىن ساقتاپ قالعان دۇرىس.
ەلباسى مەن ونىڭ اينالاسىندا جۇرگەن ادامداردىڭ وزبىرلىعىن نەمەسە قىلمىستىق ارەكەتىن ءبولىپ قاراعان ءجون دەپ ويلايمىن. پرەزيدەنتتىڭ ۇستاپ وتىرعان ساياساتى دا سونداي. مەملەكەت ءۇشىن، بولاشاق ۇرپاقتار ءۇشىن، ەگەمەندىكتىڭ تۋىن بەرىك قىلۋ ءۇشىن نازاربايەۆتىڭ اتقارعان ءرولى وتە جوعارى. و كىسىنى ءقازىر قورلايتىن بولساق، ول – ەگەمەندىكتى قورلاعانمەن بىردەي نارسە.
سوندىقتان بۇل تۇرعىدا مەن حالىقتىڭ ەلباسىعا كەشىرىمدى بولعانىن قالار ەدىم. ال وتباسىنىڭ جاقىن مۇشەلەرى مەن وتباسىعا جاقىن ازاماتتار، جاقىندىعى بولماسا دا سول كىسىنىڭ جانىندا ءجۇرىپ كوپ پايداسىن كورگەن ازاماتتار بار. سولاردىڭ ءىسىن كەشىرۋ-كەشىرمەۋ جاساعان ىس-ارەكەتتەرىنە، قىلمىسىنا بايلانىستى"، - دەدى قۇلەكەيەۆ.
