كەيىنگى ۋاقىتتا الەۋمەتتىك جەلىدە كەزىندە دارىنىمەن كوپشىلىكتى تاڭداي قاقتىرعان، اقىن مۇحتار شاحانوۆتىڭ باتاسىن العان “بالا جامبىلدىڭ” ەسىمى قايتا جاڭعىرا باستادى. TikTok قولدانۋشىلارى، سونىڭ ىشىندە شاراپات اسابا ەسىمدى اۆتور ونىڭ بۇرىنعى بەينەجازبالارىن ءبولىسىپ، ەل ىشىندە قىزۋ تالقى تۋدىردى. كوپ ۇزاماي، جۇرت ىزدەگەن بالا جايلى تىڭ اقپارات بەلگىلى بولدى، دەپ حابارلايدى Dalanews.kz.
جامبىل دۇيسەن ۇلى بۇگىندە ەر جەتىپ، ءبىلىمىن اقش-تا جالعاستىرىپ ءجۇر. جەلىدە تاراعان ءبىر ۆيدەوسىندا جامبىل دۇيسەن ۇلى نيۋ-يوركتىڭ ءدال ورتاسىندا، تايمس-سكۆەر الاڭىندا تۇرعان ءساتىن كورسەتىپ، تۋعان-تۋىستارىنا سالەم جولدايدى.
“ءقازىر ءبىز نيۋ-يوركتىڭ قاق ورتاسىندامىز. تايمس-سكۆەردە ادامدار تولىپ ءجۇر. بۇل جەر وتە ادەمى، اسەرلى ەكەن”، – دەيدى ول بەينەجازبادا.
ايتا كەتەيىك، جامبىل دۇيسەن ۇلى جاس كەزىنەن ەرەكشە زەرەكتىگىمەن تانىلىپ، ءتۇرلى رەسپۋبليكالىق جانە حالىقارالىق بايقاۋلاردا توپ جارعان. اشىق دەرەكتەرگە سۇيەنسەك، ول مەكتەپتى قاتارلاستارىنان ءۇش جىل بۇرىن اياقتاعان.
