Keıingi ýaqytta áleýmettik jelide kezinde darynymen kópshilikti tańdaı qaqtyrǵan, aqyn Muhtar Shahanovtyń batasyn alǵan “Bala Jambyldyń” esimi qaıta jańǵyra bastady. TikTok qoldanýshylary, sonyń ishinde Sharapat asaba esimdi avtor onyń burynǵy beınejazbalaryn bólisip, el ishinde qyzý talqy týdyrdy. Kóp uzamaı, jurt izdegen bala jaıly tyń aqparat belgili boldy, dep habarlaıdy Dalanews.kz.
Jambyl Dúısenuly búginde er jetip, bilimin AQSH-ta jalǵastyryp júr. Jelide taraǵan bir vıdeosynda Jambyl Dúısenuly Nú-Iorktiń dál ortasynda, Taıms-skver alańynda turǵan sátin kórsetip, týǵan-týystaryna sálem joldaıdy.
“Qazir biz Nú-Iorktiń qaq ortasyndamyz. Taıms-skverde adamdar tolyp júr. Bul jer óte ádemi, áserli eken”, – deıdi ol beınejazbada.
Aıta keteıik, Jambyl Dúısenuly jas kezinen erekshe zerektigimen tanylyp, túrli respýblıkalyq jáne halyqaralyq baıqaýlarda top jarǵan. Ashyq derekterge súıensek, ol mektepti qatarlastarynan úsh jyl buryn aıaqtaǵan.
