تۇركىستان وبلىسىنىڭ اكىمى جانسەيىت تۇيمەبايەۆ كەنتاۋ قالاسىنا ارنايى جۇمىس ساپارىمەن باردى. ساپارى بارىسىندا ونداعى ءبىرقاتار نىسانداردى ارالاپ، اتقارىلىپ جاتقان جۇمىستارمەن تانىستى.

الدىمەن ايماق باسشىسى ورانعاي اۋىلدىق وكرۋگىندەگى «ال-بەرەكە» اۋىل شارۋاشىلىعى وندىرىستىك كووپەراتيۆىنە ايالدادى. 2016 جىلى قۇرىلعان نىسان كوكونىس جانە جەمىس-جيدەكتەردى قايتا وڭدەۋ، ساقتاۋ جانە دايىن ءونىمدى وتكىزۋ شارۋالارىن اتقارۋعا باعىتتالعان. كووپەراتيۆتىڭ جالپى جەر كولەمى - 300 گەكتاردى قۇرايدى. وندا 50 گا الما باۋى، 30 گا ءجۇزىم، 40 گا الحورى، 40 گا ابريكوس، 140 گا باقشا، كوكونىس داقىلدارى ەگىلگەن. 30 ادام تۇراقتى جۇمىسپەن قامتىلعان.

مەكەمە جىلىنا 450 مىڭ ليتر جەمىس-جيدەك شىرىنىن، 1500 توننا كوكونىس مارينادىن، 1200 توننا تومات، الما، اسقاباق ەزبەلەرىن دايىنداۋعا قاۋقارلى.

كووپەراتيۆىنە 2018 جىلدىڭ 11 ايىندا جالپى سومماسى 292 ملن. تەڭگەنى قۇرايتىن 1950 توننا تاۋار وندىرگەن. ونىڭ 1200 تونناسى ىشكى نارىققا وتكىزىلسە، 750 تونناسى رەسەي فەدەراسياسىنا ەكسپورتتالعان.

قازىرگى تاڭدا اتالعان مەكەمە اۋىل شارۋاشىلىق داقىلدارىن الۋ جونىندە جالپى جەر كولەمى 350 گەكتار قۇرايتىن 7 اۋىل شارۋاشىلىق تاۋار وندىرۋشىلەرىمەن كەلىسىم شارت جاساسقان.

سونداي-اق، ايماق باسشىسى «كەنتاۋ سەرۆيس» مەملەكەتتىك كوممۋنالدىق كاسىپورنىن ارالاپ كوردى. قالانى جىلۋمەن قامتاماسىز ەتەتىن مەكەمە 2011 جىلى قۇرىلعان. سەرىكتەستىكتە 395 ادام جۇمىس ىستەيدى. اتالعان مەكەمە 334 كوپقاباتتى تۇرعىن ۇيگە، 2121 جەكە ۇيگە، 374 كوممەرسيالىق نىسانعا جانە 102 بيۋدجەتتىك مەكەمەگە جىلۋ بەرىپ كەلەدى. جالپى قالادا 38،2 شاقىرىم ماگيسترالدىق، 116،8 شاقىرىم ىشكى ورامدىق جىلۋ قۇبىرى تارتىلعان.

مەكەمە باسشىسى تولەۋ ءاشىرحان ەلباسىنىڭ تاپسىرماسىنا سايكەس، كوممۋنالدىق قىزمەتتىڭ قۇنى 136-دان 103،88 تەڭگەگە نەمەسە 23،88 پايىزعا ارزانداتىلعانىن جەتكىزدى. سونداي-اق، تومەن جالاقى الاتىن 60-تان استام ازاماتتىڭ ەڭبەكاقىسىن كوتەرۋ ماقساتىندا مەكەمە بيۋدجەتىنەن 1 ملن. 600 مىڭ تەڭگە قارالىپ وتىرعانىن ايتتى.

اتقارىلىپ جاتقان شارۋالارعا قانىققان وبلىس اكىمى حالىققا ساپالى قىزمەت كورسەتۋ باعىتىندا ءتيىستى شارالاردى دەر كەزىندە اتقارۋدى تاپسىردى.