ۆلاديمير زەلەنسكيي حاركوۆقا بارعان ساپارىندا قيراعان قالانى ارالاپ، قالا باسشىلىعىمەن كەزدەسىپ، شاھاردى قايتادان قالىپقا كەلتىرۋ ماسەلەسىن تالقىلادى. سونىمەن قاتار زەلەنسكيي اسكەريلەرمەن كەزدەسىپ، ولاردى مەملەكەتتىك ناگاردالارمەن ماراپاتتادى.
حاركوۆ قالاسىنىڭ اسكەري اكىمشىلىگىنىڭ باسشىسى ولەگ سينەگۋبوۆ پرەزيدەنت الدىندا بايانداما جاساپ، ورىس وكۋپانتتارى اسكەري شابۋىلى سالدارىنان قالداعى 2229 كوپقاباتتى ءۇي بۇلىنگەنىن، 225 ءۇيدىڭ تولىقتاي تالقاندالعانىن ايتتى.
حاركوۆ قالاسىنىڭ سولتۇستىك-شىعىس بولىگىندە ىقشام اۋداندارداعى تۇرعىن ۇيلەردىڭ 30،2%-ى قاتتى بۇلىنگەنى بەلگىلى بولدى.
زەلەنسكيي قالاعا جاساعان جۇمىس ساپارىندا زىمىرانمەن سوققى بەرىلگەن وبلىستىق اكىمشىلىك عيماراتى مەن بۇلىنگەن تۇرعىن ۇيلەردى ءوز كوزىمەن كوردى.
– كەڭەس زامانىندا سالىنعان پانەل ۇيلەر سوعىستان قاتتى زارداپ شەكەنىن كورىپ ءجۇرىمىز. سوعىس اياقتالعاننان كەيىن ەلىمىزدەگى پانەل ۇيلەردى ءسۇرىپ تاستاپ، زامان تالابىنا ساي ساپالى ۇيلەر سالۋدى ويلاستىرۋىمىز كەرەك. بۇل ءۇشىن قالا اكىمدىگى قاجەتتى نەسيە كوزدەرىن تاباتىن بولادى. مەملەكەت بۇل باعىتتاعى جۇمىستارعا بارىنشا قولداۋ كورسەتەدى، – دەدى زەلەنسكيي.
