گازبەن قامتۋ، ساپالى ەلەكترمەن جانە اۋىز سۋمەن قامتۋ سەكىلدى وزەكتى پروبلەمالار قايتا جانداندى. بۇل تۋرالى اپپارات وتىرىسىندا كەلەس اۋدانىنىڭ اكىمى اقمەنتاي ەسبايەۆ اۋدانداعى وزەكتى ماسەلەلەر تۋرالى باياندادى.
اتاپ ايتقاندا، كەلەس اۋدانىنداعى «اباي» اگتس-نىڭ قۇرىلىس-مونتاج جۇمىستارىن تامىز ايىنىڭ اياعىندا اياقتاپ، قابىلداۋ جۇمىستارىن جۇرگىزۋ جوسپارلانۋدا.
2019 جىلى باستاۋ العان قۇرىلىس اراعا ۋاقىت سالىپ، قايتا جانداندى. نىساننىڭ قۇرىلىس جۇمىستارى اياقتالىپ، پايدالانۋعا تاپسىرىلعان جاعدايدا اباي اۋىلى، قوشقاراتا، ۇشقىن، بىرتىلەك اۋىلدىق وكرۋگتەرىنىڭ ەلدى مەكەندەرىن تولىق تابيعي گازبەن قامتاماسىز ەتۋگە «اباي» اگتس قۋاتى جەتەتىن بولادى.
وبلىستىڭ وڭتۇستىك اۋماعىندا ورنالاسقان 5 اۋدانىن (كەلەس، سارىاعاش، ماقتارال، جەتىساي، شاردارا) ساپالى ەلەكتر قۋاتىمەن قامتاماسىز ەتۋ ماقساتىندا 220/110/10 كۆ «قىزىلاسكەر» قوسالقى ستانساسىنىڭ قۇرىلىسىنا 7،2 ملرد. تەڭگە جانە وسى «قىزىلاسكەر» قوسالقى ستانساسىنان ەكى 110 كۆ ەلەكتر جەلىسىن (91 كم ەج) سالۋ قۇرىلىسىنا 1،8 ملرد تەڭگە جوسپارلانعان.
وبلىس اۋماعىنداعى ەلدىمەكەندەردى ساپالى، تۇراقتى ەلەكتر ەنەرگياسىمەن قامتاماسىز ەتۋدىڭ 2019-2022 جىلدارعا ارنالعان ءىس شارا جوسپارىنا سايكەس 200-گە جۋىق اۋىلدى ساپالى ەلەكتر قۋاتىمەن تولىعىمەن قامتۋ جوسپارلانعان.
2018 جىلى 4 دانا اۆتوترانسفورماتور ورناتىلىپ جانە سارىاعاش اۋدانىندا ورنالاسقان جىلعا قس-نان «قىزىلاسكەر» قس دەيىن 72،2 شاقىرىم ەلەكتر جەلىسى جۇرگىزىلىپ، جۇمىستار تولىعىمەن اياقتالعان. وسى نىساندى قوسۋ-رەتتەۋ جۇمىستارىن جۇرگىزۋگە مامىر ايىندا وبلىستىق بيۋدجەتتەن 188،5 ملن. تەڭگە قارجى قارالىپ، جۇمىستار جۇرگىزىلۋدە. «قىزىلاسكەر» قس قۇرىلىس جۇمىستارىن قىركۇيەك ايىندا اياقتاپ، قابىلداۋ جۇمىستارىن جۇرگىزۋ جوسپارلانعان. ناتيجەسىندە وبلىستىڭ وڭتۇستىك ايماقتارى ونەركاسىپ جانە اۋىل شارۋاشىلىعى نىساندارى تۇراقتى جانە ساپالى ەلەكتر ەنەرگياسىمەن قامتىلادى.
كەلەس اۋدانىندا 468،6 ملرد. تەڭگەنى قۇرايتىن، اۋماعى 500 گەكتارعا جۋىق جىلىجاي كەشەنى سالىنادى. ول ءۇشىن 466 گەكتار جەر بولىنبەك. سونداي-اق بيىل «ECOCULTURE-EURASIA» ءجشس-ى جالپى قۇنى 25 ملرد. تەڭگەنى قۇرايتىن 27 گا جەر ۋچاسكەسىنە جىلىجاي كەشەنىن سالۋ جوسپارلاپ وتىر.
