ءماجىلىس دەپۋتاتى، «AMANAT» پارتياسى فراكسياسىنىڭ مۇشەسى ايدوس سارىم يمپورتتىق شيكىزاتتى كەدەننەن وتكىزۋ ماسەلەسى بويىنشا ۇلتتىق ەكونوميكا ءمينيسترى سەرىك جۇمانعارينگە دەپۋتاتتىق ساۋال جولدادى، دەپ حابارلايدى Dalanews.kz.
دەپۋتاتتىڭ ايتۋىنشا، كەدەندىك راسىمدەردەگى جۇيەلى قيىندىقتار وتاندىق وندىرۋشىلەر مەن بيزنەستىڭ دامۋىنا ايتارلىقتاي كەدەرگى كەلتىرىپ وتىر. كاسىپكەرلەر تاۋارلاردى كەدەننەن شىعارۋ بارىسىندا ۇزاققا سوزىلاتىن، تۇسىنىكسىز جانە انىق رەگلامەنتتەرسىز راسىمدەرگە تاپ بولادى. ساراپتامالار اپتالاپ نەمەسە ايلاپ سوزىلىپ، ناقتى مەرزىم بەلگىلەنبەگەندىكتەن بيزنەس شىعىنعا ۇشىرايدى.
"بۇل بەلگىسىزدىك ءوندىرىس قۇرالدارىن ساقتاۋ شىعىندارىنا، ءوندىرىستىڭ توقتاۋىنا، كەلىسىمشارتتاردىڭ بۇزىلۋىنا، ايىپپۇلداردىڭ سالىنۋىنا، ءونىمنىڭ وزىندىك قۇنىنىڭ وسۋىنە جانە كاسىپورىنداردىڭ باسەكەگە قابىلەتتىلىگىنىڭ تومەندەۋىنە اكەپ سوقتىرادى"، – دەدى ايدوس سارىم ءماجىلىس وتىرىسىندا.
دەپۋتات كەشىگۋلەر اسىرەسە تەز بۇزىلاتىن تاۋارلار مەن ءوندىرىس ءۇشىن ستراتەگيالىق ماڭىزدى شيكىزاتقا ءقاۋىپ توندىرەتىنىن اتاپ ءوتتى. مىسالى، شىعىس قازاقستان وبلىسىنداعى "الپريما" ج ش س سپورتتىق كيىم تىگۋگە ارنالعان 3 توننا ماتانى 4 تامىزدان بەرى كەدەننەن شىعارا الماي وتىر. سالىقتار مەن سەرتيفيكاتتار تولەنگەنىنە قاراماستان، تاۋار 50 كۇننەن بەرى ۋاقىتشا ساقتاۋ قويماسىندا تۇر. بۇل كومپانيانىڭ قارجىلاي جاعدايىنا جانە كەلىسىمشارتتاردى ورىنداۋىنا ءقاۋىپ توندىرۋدە.
ايدوس سارىم كاسىپورىنداردىڭ الدىن الا شيكىزات ساتىپ الىپ، ءوندىرىستى قامتاماسىز ەتۋگە تىرىساتىنىن، ءبىراق ولار ۇنەمى كەدەن ورگاندارىنا تاۋەلدى بولىپ وتىرعانىن ايتتى.
"كەدەن راسىمدەرى لوتوترونعا اينالديا. ءبىر كۇندىك كىدىرىس ونداعان ادامنىڭ جالاقىسىنا، وتباسىنا جانە ءونىمنىڭ باعاسىنا اسەر ەتەدى"، – دەدى دەپۋتات.
سونىمەن قاتار كاسىپورىندار بارلىق سالىق پەن الىمداردى تولەۋگە دايىن ەكەنىن، الايدا كەدەندىك راسىمدەردىڭ جىلدام ءارى اشىق ءوتۋىن كۇتەتىنىن اتاپ ءوتتى. بۇل تاجىريبە مەملەكەت باسشىسىنىڭ شاعىن جانە ورتا بيزنەستى قولداۋ، كەدەن راسىمدەرىن وڭتايلاندىرۋ جانە اكىمشىلىك كەدەرگىلەردى جويۋ جونىندەگى تاپسىرمالارىمەن قايشى كەلەتىنىن ايتتى.
ايدوس سارىم مينيسترلىكتەن يمپورتتىق شيكىزاتتى كەدەننەن وتكىزۋ مەحانيزمىن جەڭىلدەتۋ، كاسىپورىندارعا جەدەل قولجەتىمدىلىكتى قامتاماسىز ەتۋ جانە ارتىق اكىمشىلىك كەدەرگىلەردى جويۋ بويىنشا ناقتى شارا قابىلداۋدى تالاپ ەتتى.
